ముస్లిం ప్రాబల్య దేశాల్లో షరియా చట్టాలు ఎంతో కఠినంగా ఉంటాయి. వీటిని ఎవరైనా ఉల్లంఘిస్తే ఆ చట్టం మేరకు శిక్షలు అనుభవించాల్సిందే. తాజాగా, ఓ ప్రేమజంట పెళ్లికి ముందే తొందరపడుతూ అక్కడి అధికారుల కంటికి చిక్కారు. అంతే, షరియా చట్టం మేరకు ఆ ప్రేమికులకు బహిరంగంగా బడితెపూజ చేశారు.
తాజాగా వెలుగులోకి వచ్చిన ఈ వివరాలను పరిశీలిస్తే, ముస్లిం దేశాల్లో ఇండోనేషియా ఒకటి. ఇక్కడ అకే ఫ్రావీన్స్‌లో ఓ యువతీయువకుడు ప్రేమించుకున్నారు. వీరిద్దరూ పెళ్లి చేసుకోవాలని భావించారు. అయితే, ఆ ప్రేమ జంట పెళ్లికి ముందే శారీరకంగా కలుసుకునేందుకు ప్రయత్నించి అడ్డంగా చిక్కిపోయారు.
దీంతో షరియా అధికారులు ఆ ప్రేమికులను అందరిముందు నిలబెట్టి బడితెపూజ చేశారు. షరియా చట్టం మేరకు వంద బెత్తం దెబ్బల శిక్ష విధించారు. దీంతో అధికారులు ఈ శిక్షను బహిరంగంగా అమలు చేశారు. అయితే, ఆ యువతి ఆ బెత్తం దెబ్బలకు తాళలేక స్పృహతప్పి పడిపోయినప్పటికీ క్షమించలేదు. ఆ యువతికి మధ్యమధ్యలో వైద్యపరీక్షలు చేస్తూ వంద బెత్తం దెబ్బల శిక్షను పూర్తిచేశారు.
అలాగే, ఆ యువకుడికి కూడా వంద దెబ్బల శిక్షను పూర్తిచేశారు. ఈ దెబ్బలకు యువకుడి వీపు చిట్లిపోయింది. నిజానికి ఇండోనేషియాలో పెళ్లికాని యువతీ యువకులు ఒకరిని ఒకరు తాకడం, చేతిలో చేయి వేసుకుని నడవడం శిక్షార్హం. గతంలో కూడా ఓ యువతీ యువకుడు ఇలాగే చేతిలోచేయివేసుకుని నడిచినందుకుగాను బెత్తం దెబ్బల శిక్షను విధించిన విషయం తెల్సిందే.