ఓ యువతి నిండు గర్భిణి. స్నానం చేసేందుకు బాత్రూమ్‌కు వెళ్లింది. టాప్ తిప్పుకుని స్నానం చేయడం ప్రారంభించింది. ఇంతలో ఓ బిడ్డను ప్రసవించింది. అయితే, ఆ పసికందును బాత్రూమ్ వెంటిలేటర్ నుంచి బయటకు విసిరేసింది. ఆ తర్వాత బాత్రూమ్‌ను శుభ్రం చేసి.. ఏమి జరగనట్టుగా పడక గదికి వెళ్లింది. ఈ షాకింగ్ ఘటన అమెరికాలోని న్యూయార్క్ నగరంలో జరిగింది.
తాజాగా వెలుగులోకి వచ్చిన వివరాలను పరిశీలిస్తే, న్యూయార్క్‌లోని క్వీన్స్ ఏరియాలో భార‌త సంత‌తికి చెందిన అమెరికా 23 యేళ్ళ యువతి స‌బితా దూక్ర‌మ్‌. ఈమెకు వివాహమై భ‌ర్త‌తో క‌లిసి నివ‌సిస్తోంది. గ‌ర్భ‌వ‌తి అయిన ఆమె ఈ నెల 10న స్నానం చేస్తుండగా బాత్రూంలో ప్రసవించింది. వెంట‌నే బాలుడిని వెంటిలేట‌ర్‌లో నుంచి బ‌య‌ట‌ప‌డేసి బాత్రూంను శుభ్రంగా క‌డిగి, బెడ్‌రూంలోకి వెళ్లి నిద్ర‌పోయింది.
అయితే బాలుడి ఏడుపు విని ఇరుగుపొరుగువారు ఆస్ప‌త్రికి త‌ర‌లించారు. బాలుడి మెద‌డుకు బాగా గాయాల‌య్యాయ‌ని, మెదడులో వాపు ఉంద‌ని వైద్యులు తెలిపారు. మ‌రికొన్ని గంట‌లు గ‌డిస్తేగానీ ఏమీ చెప్ప‌లేమ‌ని వెల్ల‌డించారు. కాగా, ఈ ఘ‌ట‌న‌పై పోలీసులు కేసు న‌మోదు చేసి ద‌ర్యాప్తు చేప‌ట్టగా అసలు విషయం వెలుగులోకి వచ్చింది.
ప్ర‌స‌వించిన విష‌యాన్ని కుటుంబ‌స‌భ్యులు ఎవ‌రికీ చెప్ప‌కుండా ఎందుకు దాచావ‌న్నపోలీసుల ప్ర‌శ్న‌కు స‌బితా దూక్ర‌మ్‌.. 'నేను బాత్రూం వెళ్లి స్నానం చేస్తుండగా బాబు పుట్టాడు. అప్పుడు ఏం చేయాలో నాకు అర్థం కాలేదు. నాకు చాలా భ‌యం వేసింది. బాత్రూంలో ఉన్న క‌త్తెర‌తో బొడ్డుతాడు క‌ట్‌చేసి బాబును బ‌య‌టికి విసిరేశా. ఆ తర్వాత నా దుస్తుల‌ను బాత్రూంలోని లాండ్రీలో ప‌డేసి, బాత్రూంను శుభ్రంగా క‌డిగి బ‌య‌టికి వ‌చ్చి బెడ్రూంలో ప‌డుకున్నా' అని సింపుల్‌గా చెప్పింది.