ప్రపంచ చిత్రపటంలో ఆ దేశాన్ని గుర్తించాలంటే దర్పణం వేసుకుని వెతకాల్సిందే. కానీ, ఆ దేశంలో అమలు చేసే చట్టాలు మాత్రం అత్యంత కఠినంగా ఉంటాయి. ఆ దేశం పేరు బ్రూనే. ఇపుడు అత్యంత కఠినమైన ఇస్లాం చట్టాలను అమలు చేయాలని నిర్ణయించింది. స్వలింగ సంపర్కం లేదా వ్యభిచారం చేసినా వారిని రాళ్ళతో కొట్టి చంపేస్తారు. అంటే ఈ నేరాలకు పాల్పడేవారిని చనిపోయేంతవరకు రాళ్లతో కొడతారు.
ప్రస్తుతం ఈ దేశంలో సుల్తాన్ పాలన కొనసాగుతోంది. ఇపుడు అత్యంత కఠినమైన ఇస్లాం చట్టాలను అమల్లోకి తీసుకొచ్చింది. ఈ చట్టాలపై అంతర్జాతీయంగా ఎన్ని విమర్శలు వచ్చినా సుల్తాన్ హసనల్ బోల్కియా ప్రభుత్వం ఏమాత్రం వెనక్కి తగ్గడం లేదు. ఫలితంగా తూర్పు ఆసియా, ఆగ్నేయాసియా దేశాల్లో షరియా చట్టాన్ని జాతీయ స్థాయిలో అమలు చేసిన తొలి దేశంగా రికార్డు సృష్టించింది.
బోర్నియో ద్వీపంలో ఉన్న దేశాల్లో ఇది ఒకటి. పైగా, ఇది అతి చిన్న దేశం. ఇక్కడ షరియా చట్టం బుధవారం నుంచి అమల్లోకి వచ్చింది. ఈ చట్టం ప్రకారం... బ్రూనేలో గే సెక్స్, వ్యభిచారం నేరాలకు పాల్పడేవారిని మరణించే వరకు రాళ్ళతో కొట్టి శిక్షిస్తారు. దొంగతనం చేసినవారి చేతులు, పాదాలు నరికేస్తారు. రేప్, దొంగతనం వంటి నేరాలకు కూడా మరణ శిక్ష విధించే అవకాశం ఉంది. ప్రవక్త మహమ్మద్‌‌ను అవమానించడం మరణ శిక్ష విధించదగిన నేరం. ఈ శిక్షలు ముస్లింలకు, ముస్లిమేతరులకు కూడా వర్తిస్తాయి.