పొడిచర్మం కలిగివున్నవారు చలికాలంలో మాయిశ్చరైజర్ వాడాలని బ్యూటీషియన్లు అంటున్నారు. చర్మం పగలకుండా వుండాలంటే మాయిశ్చరైజర్లు వాడాలి. సన్‌స్క్రీన్ క్రీమ్‌లు వాడాలి. స్నానానికి ముందు టీ స్పూన్ బాదం నూనె, అర టీ స్పూన్ తేనె కలిపి ముఖానికి, చేతులకు రాసి, మసాజ్ చేయాలి. ఇలా చేస్తే చలికాలంలో పొడిబారే చర్మం మృదువుగా తయారవుతుంది. ఆలివ్ ఆయిల్, అలోవెరా జెల్ సమపాళ్లలో తీసుకొని అందులో కొద్దిగా వెనిలా ఎసెన్స్ కలపాలి. ఈ మిశ్రమాన్ని చలికాలం మాయిశ్చరైజర్‌గా ఉపయోగించవచ్చు.
సున్నిత చర్మం కలిగిన వారు చలికాలంలో జాగ్రత్తలు తీసుకోవాలి. రసాయనాలు వున్న సన్‌స్క్రీన్లను వాడాలి. పెర్ఫ్యూమ్‌ క్రీములకు దూరంగా వుండాలి. సెన్సిటివ్ స్కిన్ కోసం డిజైన్ చేసిన ఉత్పత్తులను వాడటం మంచిది.
శీతాకాలంలో ఆయిలీ స్కిన్ వారికి పెద్ద సమస్యలేమీ ఉండవు. వీళ్ల చర్మం చలికాలంలో కూడా సాధారణంగా వుంటుంది. వీరు సూర్యరశ్మి నుంచి స్కిన్ రక్షణకుగాను వాటర్‌ బేస్డ్‌ సనస్ర్కీన్‌ లోషన్స్ వాడితే మంచిది. ఆయిల్ స్కిన్ కలిగివున్న వారు అలోవేరా క్రీములను వాడటం మంచి ఫలితాలనిస్తుంది.
చర్మం పొడిబారకుండా ఉండాలంటే మృతకణాలను తొలగిస్తూ ఉండాలి. ఇందుకోసం..కార్న్‌ఫ్లేక్స్‌ని పొడి చేసి, అందులో తేనె, పాలు కలిపి చర్మానికి పట్టించి మర్దనా చేయాలి. తద్వారా మృతకణాలు తొలగిపోయి.. చర్మం మృదువుగా తయారవుతుంది.