గూడూరులో దారుణం: కాలేజీకి వెళ్తున్న యువతిని కత్తితో బెదిరించి అత్యాచారం

నెల్లూరు జిల్లా గూడురులో దారుణం జరిగింది. కాలేజీకి వెళ్తున్న యువతిని వినయ్ అనే రౌడీషీటర్ బెదిరించి ఆమెను బలవంతంగా ఆటోలో ఎక్కించుకుని తీసుకుని వెళ్లాడు. ఊరి బయట నిర్మాణంలో వున్న ఇళ్ల వద్దకు తీసుకుని వెళ్లి అక్కడ ఆమెపై అత్యాచారం చేసాడు.

నిందితుడు గత రెండేళ్లుగా తనను పెళ్లి చేసుకోవాలని బెదిరిస్తూ వస్తున్నాడు. అతడిని హెచ్చరించడంతో ఆమెను పట్టించుకోనట్లే వున్నాడు కానీ ఈరోజు ఆమె కాలేజీకి వెళ్తుండగా అడ్డగించాడు. బలవంతంగా ఆమెను ఆటోలో ఎక్కించుకుని తీసుకెళ్లి, తనను పెళ్లాడాలంటూ ఒత్తిడి చేసాడు. ఎంత బ్రతిమాలినా యువతి అంగీకరించకపోవడంతో ఆమెపై అత్యాచారం చేసాడు.

అవమానభారాన్ని తట్టుకోలేని బాధితురాలు ఇంటికి వచ్చి ఇంటిని శుభ్రపరిచే లైజాల్ లిక్విడ్ తాగి ఆత్మహత్య యత్నానికి పాల్పడింది. కుటుంబ సభ్యులు గమనించి ఆమెను వెంటనే సమీప ఆసుపత్రికి తరలించారు. కేసు నమోదు చేసుకున్న పోలీసులు దర్యాప్తు చేస్తున్నారు. నిందితుడిని అదుపులోకి తీసుకుని అతడికి కఠిన శిక్ష విధిస్తామని చెప్పారు. యువతలో కొందరు మద్యపానం వంటి వ్యసనాలకు బానిసలై జీవితాలను నాశనం చేసుకుంటున్నారనీ, ఆడపిల్లల జోలికెళ్తే తీవ్రచర్యలు వుంటాయని పోలీసులు హెచ్చరిస్తున్నారు.