చెన్నైలో ఓ దారుణం జరిగింది. ప్రియుడితో అక్రమ సంబంధం పెట్టుకున్న భార్యను పెద్ద మనస్సుతో కట్టుకున్న భర్త క్షమించాడు. పైగా, భార్యను తన వద్దకు రావాలని ఫోను చేశాడు. ఈ మాటలు ఆమె ప్రియుడికి ఏమాత్రం రుచించలేదు. ఆమెతో వివాహేతర సంబంధాన్ని వదులుకోరాదని భావించిన ప్రియుడు ఆమె భర్తను హత్య చేశాడు.
తాజాగా వెలుగులోకి వచ్చిన ఈ వివరాలను పరిశీలిస్తే, 33 యేళ్ళ శంకర్ అనే వ్యక్తి పెయింటింగ్ పనులు చేస్తూ చెన్నైలో ఉంటున్నాడు. ఈయనకు తిరునెల్వేలికి చెందిన ఓ మహిళతో వివాహమైంది. పుట్టింటిలోనే ఉంటున్న ఆ మహిళకు స్థానికంగా ఉండే ఓ వ్యక్తితో వివాహేతర సంబంధం ఏర్పడింది. ఈ విషయం భర్తకు తెలిసింది., ఈ నేపథ్యంలో తాను పని చేసే చెన్నైలోనే కలిసివుందామని, అక్కడకు రావాలని ఆమెను ఫోనులో కోరాడు.
ఈ విషయం తెలిసిన ప్రియుడు ఆగ్రహంతో ఊగిపోయాడు. తన ప్రియురాలు చెన్నైకు వెళితే అక్రమ సంబంధం తెగిపోతుందని భావించి, శంకర్‌ను కలిసేందుకు చెన్నైకు వచ్చాడు. పెయింటింగ్ పనులు చేసే స్థలానికెళ్లి శంకర్‌తో గొడవపడ్డాడు. ఆ తర్వాత తన వద్ద ఉన్న కత్తితో పొడిచి హత్య చేశాడు. ఆ తర్వాత అక్కడ నుంచి పారిపోయాడు. దీనిపై కేసు నమోదు చేసిన పోలీసులు అతని కోసం గాలిస్తున్నారు.