Vinod Kambli ఆస్పత్రిలో వినోద్ కాంబ్లీ... వైద్యుల షాకింగ్ నివేదిక

Vinod Kambli

Vinod Kambli భారత మాజీ క్రికెటర్ వినోద్ కాంబ్లీ ఆరోగ్య పరిస్థితి మరింతగా క్షీణించింది. దీంతో కుటుంబ సభ్యులు శనివారం నాడు థానేలోని ఒక ప్రైవేట్ ఆస్పత్రిలో చేర్చారు. అక్కడ కాంబ్లీకి వైద్య పరీక్షలు నిర్వహించిన డాక్టర్లు సోమవారం షాకింగ్ నివేదిక ఇచ్చారు. అతని మెదడులో రక్తం గడ్డకట్టినట్లు వైద్యులు నిర్ధారించారు.

కాంబ్లీకి చికిత్స చేస్తున్న డాక్టర్ వివేక్ త్రివేది మాట్లాడుతూ.. భారత మాజీ క్రికెటర్ ఆరంభంలో మూత్రనాళ ఇన్ఫెక్షన్, తిమ్మిరితో బాధపడుతూ శనివారం భివాండి పట్టణంలోని కల్హేర్ ప్రాంతంలోని ఆసుపత్రిలో చేరాడు. అయితే, ఆసుపత్రిలో అతనిని పర్యవేక్షిస్తున్న వైద్య బృందం వరుస పరీక్షల తర్వాత కాంబ్లీ మెదడులో రక్తం గడ్డకట్టినట్లు గుర్తించిందని త్రివేది తెలియజేశారు.

కాంబ్లీ ఆరోగ్యాన్ని నిరంతరం పర్యవేక్షిస్తున్నామని, వైద్య బృందం మంగళవారం అదనపు వైద్య పరీక్షలు నిర్వహిస్తుందని డాక్టర్ తెలిపారు. కాంబ్లీకి జీవితాంతం ఉచిత చికిత్స అందించాలని ఆసుపత్రి ఇన్‌చార్జ్ ఎస్.సింగ్ నిర్ణయించుకున్నట్లు త్రివేది తెలిపారు.

1996 ప్రపంచ కప్ జట్టులో సభ్యుడైన కాంబ్లీ తన రిటైర్మెంట్ తర్వాత కెరీర్లో ఆరోగ్యపరమైన ఒడిదుడుకులు, ఆర్థిక ఇబ్బందులలో కూరుకుపోయాడు. అతను ఇటీవల తన చిన్ననాటి కోచ్ రమాకాంత్ అచ్రేకర్ స్మారక కార్యక్రమంలో కనిపించిన విషయం తెలిసిందే. 

ఆ సమయంలో కూడా అతను బలహీనంగానే కనిపించాడు. ఈ కార్యక్రమంలో తన చిన్ననాటి స్నేహితుడు సచిన్ టెండూల్కర్‌ను కలిసిన తర్వాత భావోద్వేగానికి గురయ్యాడు. ఇక ఇటీవల అతని ఆరోగ్య పరిస్థితి గమనించిన భారత మాజీ కెప్టెన్లు సునీల్ గవాస్కర్, కపిల్ దేవ్ సహా పలువురు మాజీ క్రికెటర్లు వినోద్ కాంబ్లీకి సహాయం చేయడానికి ముందుకొచ్చారు.