అమెరికా అధ్యక్షుడుగా జో బైడెన్ ప్రమాణ స్వీకారం చేయనున్నారు. ఈ ప్రమాణ స్వీకారోత్సవానికి ఏర్పాట్లు పూర్తయ్యాయి. భారత కాలమానం ప్రకారం బుధవారం రాత్రి 10 గంటలకు ఈ ప్రమాణ స్వీకారోత్సవ ఘట్టం జరుగనుంది. ఇందుకోసం కేపిటల్ భవనాన్ని సర్వాంగసుందరంగా అలంకరించారు.
అయితే, ఈసారి కరోనా కారణంగా ఈ కార్యక్రమాన్ని నిరాడంబరంగా నిర్వహించేందుకు అమెరికా మొగ్గుచూపింది. దీంతో ప్రతిసారి లక్షలాది మంది వచ్చే ఈ వేడుక ఈసారి చాలా తక్కువ మంది సమక్షంలో జరగనుంది. అధికారిక సమాచారం ప్రకారం ఓ వెయ్యి మంది మాత్రమే ఈ కార్యక్రమానికి హాజరుకానున్నారని తెలుస్తోంది.
బుధవారం రాత్రి 8.30 గంటల(భారత కాలమానం ప్రకారం) నుంచి ప్రెసిడెన్సియల్ ఇనాగురల్ కమిటీ(పీఐసీ) ఈ కార్యక్రమాన్ని ప్రారంభించనుంది. అదేసమయం నుంచి ఈ వేడుక సామాజిక మాధ్యమాల్లో, టీవీ చానెల్స్‌లో ప్రత్యక్షప్రసారంకానుంది. అయితే, రాత్రి 10 గంటల ప్రాంతంలో అమెరికా జాతీయ గీతంతో అసలు ప్రమాణ స్వీకారోత్సవం ప్రారంభం అవుతుంది.
ఈ కార్యక్రమాన్ని లైవ్‌లో చూడాలనుకునేవారు bideninaugural.org అనే. వెబ్‌సైట్‌లో ప్రత్యక్షప్రసారం కానుంది. దీని ద్వారానే యూట్యూబ్, ఫేస్‌బుక్, ట్విటర్ వంటి సామాజిక మాధ్యమాల్లో కూడా చూడొచ్చు. అలాగే అన్ని న్యూస్ చానెల్స్‌లో ఇదేసమయంలో ప్రత్యక్షప్రసారం కానుంది. గంటన్నర పాటు ఈ లైవ్ ఉంటుంది. ఈ కార్యక్రమాన్ని 'సెలబ్రేటింగ్ అమెరికా' పేరిట టామ్ హాంక్స్ హోస్ట్ చేయనున్నారు.