వియన్నాకు వెళ్లి చిక్కుల్లో పడ్డ విద్యుల్లేఖా రామన్.. బ్యాగు.. పాస్ పోర్టు, నగదు మిస్!?

కామెడీ నటీమణిగా పేరు సంపాదించిన విద్యుల్లేఖా రామన్ వియన్నాకు వెళ్లి చిక్కుల్లో పడ్డారు. రాజుగారి గది, రన్ రాజా రన్, సరైనోడు వంటి సినిమాల్లో కామెడీ నటీమణిగా మంచి గుర్తింపు సంపాదించిన విద్యుల్లేఖా స్నేహితులతో కలిసి ఇటీవల ఆస్ట్రియాలోని వియన్నాకు పర్యటన కోసం వెళ్లారు.

అయితే అక్కడ ఆమె తన బ్యాగును పోగొట్టుకున్నారు. సీనియర్ నటుడు మోహన్ రామన్ కుమార్తె అయిన విద్యుల్లేఖా బ్యాగులో పాస్ పోర్ట్, కార్డులు, నగదును పోగొట్టుకున్నట్లు ట్విట్టర్ ద్వారా తెలిపారు. 

హోటల్ లాబీలో ఎవరో తన బ్యాగును దొంగలించుకుపోయారని, ఆ దొంగలు ఎవరనే దానిపై విచారణ కోసం హోటల్ యాజమాన్యం సహకరించట్లేదని, సీసీటీవీ ఫుటేజీలను పరిశీలిద్దామనుకుంటే అంగీకరించట్లేదని విద్యుల్లేఖా ట్విట్టర్ ద్వారా వెల్లడించారు. దీంతో విదేశంలో నిస్సహాయ స్థితిలో ఉన్న తమను కాపాడాల్సిందిగా ప్రధాన మంత్రి నరేంద్ర మోడీ, విదేశీ వ్యవహారాల శాఖ మంత్రి సుష్మా స్వరాజ్‌లను విద్యుల్లేఖా అభ్యర్థించారు. 

హోటల్ లాబీల్లో విద్యుల్లేఖా బ్యాగు అపహరణకు గురైందని తెలుసుకున్న ఆమె కుటుంబ సభ్యులు షాక్ తిన్నారు. తమ కుమార్తెను స్వదేశానికి రప్పించేందుకు ప్రభుత్వం సహకరించాలని విజ్ఞప్తి చేశారు.