వళ్లంతా చూపించడం నా వల్ల కాదు : సాయిపల్లవి

వెండితెరపై వళ్ళంతా చూపిస్తూ అంగాంగ ప్రదర్శన చేయడం తన వల్ల కాదని హీరోయిన్ సాయి పల్లవి చెబుతోంది. ఈ ఒక్క కారణంగానే తాను ఎన్నో సినిమాలను వదులుకున్నట్టు చెప్పింది. అయినప్పటికీ.. తనకు బాధ లేదని స్పష్టం చేసింది.

పుట్టింది, పెరిగింది తమిళనాడులో అయినప్పటికీ, సాయిపల్లవి అచ్చతెలుగు అమ్మాయిలా ఉంటుంది. పైగా మాతృభాషతో పాటు.. తెలుగు, కన్నడ భాషల్లో రాణిస్తోంది. ముఖ్యంగా, ఈ అమ్మడుకు తమిళంలో కంటే తెలుగు, మలయాళ సినీ ఇండస్ట్రీలో మంచి క్రేజ్ ఉంది. 

అయితే, వెండితెరపై అందాల ఆరబోతపై ఆమె స్పందిస్తూ, 'మొదటి నుంచి కూడా తెరపై ఒక సాధారణమైన కాలేజ్ అమ్మాయిలా కనిపించడానికే ఎక్కువగా ఇష్టపడతాను. కురచ దుస్తులు వేసుకోవడం, శ్రుతిమించిన వయ్యారాలు ఒలకబోయడం నాకు ఇష్టం ఉండదు. 

'ఫిదా' సినిమాలో ఒక సీన్‌లో కురచ డ్రెస్ వేసుకున్నాను. ఆ సన్నివేశానికి అది అవసరం. అలాగే మరో సినిమాలో కనిపించాలంటే మాత్రం ఒప్పుకోను. వత్తిడి చేస్తే ఆ సినిమాను వదులుకోవడమే జరుగుతుంది. అలా వదులుకున్న సినిమాలు చాలానే వున్నాయి' అని వివరించింది. 

కాగా, సాయిపల్లవి నటనకి అవకాశం వుండే కథలను, సహజత్వానికి దగ్గరగా వుండే పాత్రలను మాత్రమే సాయిపల్లవి ఎంచుకుంటూ వెళుతోంది. గ్లామరస్‌గా కనిపించే విషయంలో మొదటి నుంచి కూడా తను అనుకున్న పరిధిని దాటకుండా జాగ్రత్తలు తీసుకుంటూ తన సినీ కెరీర్‌ను కొనసాగిస్తోంది.