"ఆర్ఆర్ఆర్" టెక్నీషియన్లకు "బంగారు కానుకలు"

దర్శక ధీరుడు ఎస్ఎస్ రాజమౌళి దర్శకత్వంలో ఎన్టీఆర్, రాంచరణ్‌లు మల్టీస్టార్ కాంబినేషన్‌లో వచ్చిన చిత్రం "ఆర్ఆర్ఆర్". ఈ చిత్రం గత నెల 25వ తేదీన ప్రపంచ వ్యాప్తంగా విడుదలైంది. తెలుగు, తమిళం, హిందీ, కన్నడ, మలయాళం భాషల్లో పాన్ ఇండియా మూవీగా విడుదలై కలెక్షన్ల కుంభవృష్టి కురిపిస్తుంది. దీంతో చిత్ర బృందం సక్సెస్‌ మత్తులో తేలిపోతోంది. 

ఈ నేపథ్యంలో ఈ చిత్రం కోసం పని చేసిన చీఫ్ టెక్నీషియన్లను హీరో రాంచరణ్ బంగారు కానుకలకు ఇచ్చారు. వారితో బ్రేక్ ఫాస్ట్ చేసిన చెర్రీ... వారికి కృతజ్ఞతాభినందనలు తెలియజేస్తూ ఒక్కొక్కరికి తులం బంగారం, స్వీట్లు కానుకగా అందజేశారు. తద్వారా తన కృతజ్ఞతను తెలియజేశారు. ట్రిపుల్ ఆర్ చిత్ర విజయానికి వివిధ భాగాల నిపుణుల అందించిన సేవలను ఈ సందర్భంగా రాంచరణ్ ప్రస్తావించి అభినందించారు. 

కాగా, ఆర్ఆర్ఆర్ చిత్రం తొలి రోజే ఏకంగా రూ.223 కోట్లను, తొలి మూడు రోజుల్లో రూ.500+ కోట్లను, తొలివారంలో రూ.750 కోట్లు చొప్పున కలెక్షన్లు రాబట్టిన విషయం తెల్సిందే. ఈ చిత్రం టాలీవుడ్‌లోనే కాకుండా బాలీవుడ్‌లో సైతం సరికొత్త రికార్డులను తిరగరాస్తుంది.