తాజాగా విడుదలైన జెర్సీ చిత్రంతో మంచి ఫామ్‌లో ఉన్నాడు నేచురల్ స్టార్ నాని. ప్రస్తుతం విక్రమ్ కే కుమార్‌తో గ్యాంగ్ లీడర్ అనే సినిమాలో నటిస్తున్న సంగతి తెలిసిందే. నాని పుట్టినరోజు సందర్భంగా కొత్త ప్రాజెక్టుకు సంబంధించిన లుక్‌ను, అలాగే టీజర్‌ను ట్విట్టర్ ద్వారా షేర్ చేశాడు. ప్రస్తుతం ఈ చిత్రం శరవేగంగా షూటింగ్ జరుపుకుంటుండగా, ఇందులో నాని ఐదుగురు మహిళలకు లీడర్‌గా కనిపించనున్నట్లు తెలుస్తోంది.
అయితే ఆ ఐదుగురు అమ్మాయిలు దొంగలుగా ఉంటారని సమాచారం. నాని వారికి నాయకుడిగా కనిపించి సందడి చేయనున్నాడట. ప్రతి చిత్రంలోనూ విభిన్న పాత్రలు పోషిస్తూ ప్రేక్షకులను అలరిస్తూ వస్తున్న నాని ఈ చిత్రంతో అభిమానులను మరింత ఎంటర్టైన్ చేయనున్నాడట.
నాని-విక్రమ్ కుమార్ కాంబోలో వస్తున్న గ్యాంగ్ లీడర్ చిత్రం నాని కెరీర్‌లో బెస్ట్ చిత్రంగా నిలుస్తుందని ఆశిస్తున్నారు. మరోవైపు నాని ఇంద్రగంటి మోహనకృష్ణ దర్శకత్వంలో ఓ చిత్రాన్ని చేస్తున్న సంగతి తెలిసిందే. ఈ చిత్రంలో సుధీర్ బాబు కూడా ముఖ్య పాత్ర పోషిస్తున్నాడు.