బాలీవుడ్ నటుడు సల్మాన్ ఖాన్ ఇంటి వెలుపలు కాల్పులు జరిపిన షూటర్లలో ఇద్దరిని గుజరాత్ రాష్ట్రంలో అరెస్టు చేశారు. ఈ ఇద్దరిని సోమవారం అర్థరాత్రి ముంబై క్రైమ్ బ్రాంచ్ పోలీసులు అదుపులోకి తీసుకున్నారు. ఆ తర్వాత వీరిని విచారణ కోసం ముంబైకు తరలించనున్నారు.
ఇటీవలే ముంబైలోని బాంద్రా వెస్ట్‌లో ఉన్న సల్మాన్ ఖాన్ నివాసం వెలుపల కాల్పుల జరిగిన కాల్పుల ఘటన సంచలనంగా మారిన విషయం తెల్సిందే. సల్మాన్ ఖాన్‌ను లక్ష్యంగా చేసుకుని ఈ కాల్పులు జరిపారన్న ప్రచారం జరిగింది. పైగా, కాల్పులు జరిగిన సమయంలో హీరో కూడా ఇంటిలోనే ఉన్నాడు. ఈ కాల్పుల ఘటనపై ముంబై క్రైమ్ బ్రాంచ్ పోలీసులు కేసు నమోదు చేసి నిందితుల కోసం గాలింపు చర్యలు చేపట్టారు. ఇందులోభాగంగా, ఇద్దరు నిందితులను గుజరాత్ రాష్ట్రంలో అదుపులోకి తీసుకున్నారు.
కాగా, ఆదివారం తెల్లవారుజామున ఈ కాల్పులు జరిగాయి. సల్మాన్ నివాసం గెలాక్సీ అపార్ట్‌మెంట్ వెలుపల ఇద్దరు గుర్తు తెలియని వ్యక్తులు ఈ కాల్పులకు తెగబడ్డారు. కాల్పుల అనంతరం అక్కడి నుంచి పారిపోయారు. మోటార్ సైకిల్‌పై వచ్చిన నిందితులు హెల్మెట్లు ధరించారు. పక్కా ప్రణాళికతో నాలుగు రౌండ్ల కాల్పులు జరిపారు. ఈ ఘటనపై మహారాష్ట్ర సీఎం ఏక్‌నాథ్ షిండే కూడా స్పందించారు. సల్మాన్ ఖాన్‌తో మాట్లాడి, ఆయనకు భద్రత పెంచాలని పోలీసులను ఆదేశించిన విషయం తెల్సిందే.