మూవీ ఆర్టిస్టు అసోసియేషన్ (మా) ఎన్నికలు.. రోజురోజుకు హీటెక్కుతున్నాయి. అధ్యక్ష పదవి కోసం బరిలోకి దిగిన ఐదుగురు అభ్యర్థులు.. ఒకరిపై ఒకరు ఆరోపణలు, ప్రత్యారోపణలు చేసుకుంటూ వార్తల్లో హాట్ టాపిక్‌గా మారుతున్నారు. ఈ క్రమంలోనే పోటీలో ఉన్న నటి హేమ.. ప్రస్తుత 'మా' ప్రెసిడెంట్‌ నరేశ్‌ నిధులను దుర్వినియోగం చేశారంటూ ఆరోపణలు చేసిన సంగతి తెలిసిందే.
రూ.5 కోట్ల నిధుల్లో రూ.3 కోట్లు మాత్రమే మా అధ్యక్షుడు నరేశ్‌ ఇప్పటివరకు ఖర్చు చేశారని, మిగతా డబ్బంతా ఏమైందని హేమ సూటిగా నిలదీసింది. అయితే హేమ చేసిన వ్యాఖ్యలను ఖండించిన నరేశ్‌..అసోసియేషన్ గౌరవాన్ని దెబ్బతీసేలా ఆమె మాట్లాడుతున్నారని పేర్కొన్నారు. అలాగే హేమపై క్రమశిక్షణ సంఘానికి ఫిర్యాదు చేస్తామని.. కమిటీ నిర్ణయం ప్రకారం తగిన చర్యలు తీసుకుంటామని తెలిపారు.
ఇందులో భాగంగానే హేమకు క్రమశిక్షణ సంఘం బిగ్ షాక్ ఇచింది. తాజాగా హేమకు క్రమశిక్షణ సంఘం షోకాజ్‌ నోటీసులు జారీ చేసింది. నరేష్‌పై చేసిన ఆరోపణలకు మరో మూడు రోజుల్లో వివరణ ఇవ్వాలని కోరుతూ హేమకు నోటీసులు పంపారు. లేని పక్షంలో క్రమశిక్షణా సంఘం నుంచి కఠిన చర్యలు తప్పవని తెలిపింది.