తమిళనాడు మాజీ ముఖ్యమంత్రి జయలలిత జీవిత చరిత్ర ఆధారంగా ఓ చిత్రం తెరకెక్కనుంది. ఇందులో జయలలిత పాత్రను బాలీవుడ్ నటి కంగనా రనౌత్ పోషించనుంది. ఈ చిత్రానికి తలైవి అనే పేరు పెట్టారు.
ఇటీవలే ఈ విషయాన్ని అధికారికంగా ప్రకటించిన కంగన తాజాగా మాట్లాడుతూ తన జీవిత కాలంలో ఎదురైన అనేక సమస్యలను, కష్టకాలాన్ని జయలలిత ధైర్యంగా ఎదుర్కొన్న తీరు అమోఘమన్నారు. జయ ఎన్నో వివాదాలు ఎదుర్కొన్నారని, ఇంకెన్నో కష్టాలు అనుభవించారని గుర్తుచేసింది. జయలలిత చాలా విధేయతతో ఉండేవారని, తాను ఎటువంటి మార్గంలో ఉన్నాను, దాని ప్రభావం ఎలా ఉంటుందన్న విషయం గురించి ఆమె ఎప్పుడూ ఆలోచించలేదని చెప్పింది.
కానీ, తాను మాత్రం ఆమె స్వభావానికి పూర్తిగా విరుద్ధమన్నారు. జయలలిత సినిమా చేయాలంటూ దర్శక, నిర్మాతలు తన వద్దకు వచ్చినప్పుడు తాను కొంత సమయం కావాలని అడిగానని చెప్పిన కంగన.. ఆ సమయంలో జయలలిత గురించి తెలుసుకునేందుకు కొన్ని పుస్తకాలు చదివానని, కొన్ని విషయాలు తెలుసుకుని ఆశ్చర్యపోయానని తెలిపింది.