బాలీవుడ్‌ నటి కంగనా రనౌత్‌ ముంబై నుంచి మకాం మార్చేసిన సంగతి తెలిసిందే. బాలీవుడ్‌లో నెపోటిజంపై మాటెత్తిన కంగనా రనౌత్‌కు అత్యాచార బెదిరింపులు వచ్చాయి. ప్రస్తుతం కంగన తన సోదరుడి పెళ్లి వేడుకల్లో బిజీగా ఉన్నారు. పెళ్లికి సంబంధించిన ఫొటోలు, వీడియోలను సోషల్‌మీడియా వేదికగా ఆమె అభిమానులతో పంచుకుంటున్నారు. ఈ నేపథ్యంలో తాజాగా ఆమె షేర్‌ చేసిన కొన్ని ఫొటోలకు ఒడిశాకు చెందిన ఓ న్యాయవాది నుంచి అత్యాచార బెదిరింపులతో కూడిన కామెంట్స్‌ వచ్చాయి. 'నడిరోడ్డుపై అత్యాచారం చేస్తా' అంటూ వచ్చిన కామెంట్స్‌ చూసి నెటిజన్లు షాక్‌ అయ్యారు.
కాగా, తన ఫేస్‌బుక్‌ అకౌంట్ హ్యాక్‌కు గురయ్యిందని న్యాయవాది తాజాగా తెలియజేశారు. ఈ మేరకు ఆయన ఓ పోస్ట్‌ పెట్టారు. తన ఫేస్ బుక్ అకౌంట్ హ్యాక్ చేసి.. ఇలాంటి అభ్యంతరకరమైన కామెంట్లు పెట్టడం జరిగిందని న్యాయవాది వివరణ ఇచ్చారు.
తన స్నేహితుల ద్వారా ఈ విషయాన్ని తెలుసుకుని షాక్‌కి గురయ్యాననని చెప్పారు. తనకు స్త్రీలు, సమాజం పట్ల గౌరవం ఉంది. తన అకౌంట్ నుంచి వచ్చిన అసభ్యకరమైన కామెంట్స్‌ వల్ల ఎవరికైనా ఇబ్బంది కలిగి ఉంటే క్షమించండని పోస్ట్‌ పెట్టారు. అలా పోస్ట్‌ పెట్టిన కొద్ది సమయానికే ఆయన తన ఫేస్‌బుక్‌ అకౌంట్ డిలీట్‌ చేశారు. అయితే సదరు కామెంట్లపై కంగన స్పందించలేదు.