తమిళనాడు మాజీ ముఖ్యమంత్రి జయలలిత జీవిత చరిత్ర ఆధారంగా తెరకెక్కిన చిత్రం తలైవి. బాలీవుడ్ నటి కంగనా రనౌత్ ప్రధాన పాత్రలో నటించిన ఈ చిత్రం ట్రైలర్‌ను ఈ నెల 23వ తేదీన కంగనా పుట్టినరోజు సందర్బంగా విడుదల చేశారు.
ఈ ట్రైలర్ అదిరిపోయిందంటూ ప్రశంసలు వస్తున్నాయి. ఈ క్రమంలో ఆ ట్రైలర్‌ను చూసిన ప్రముఖ దర్శకుడు రాంగోపాల్ వర్మ తలైవి టీమ్‌ను అభినందించారు. పైగా, కంగనపై పొగడ్తల వర్షం కురిపించారు.
"హాయ్ కంగనా అండ్ టీమ్. కొన్ని నిర్దిష్ట ప్రాంతాల్లో, కొన్ని విషయాల్లో నిన్ను నేను వ్యతిరేకించవచ్చు. అయితే, ఇంత సూపర్ డూపర్ స్పెషల్ క్యారెక్టర్ ను చేసినందుకు నీకు సెల్యూట్ చేస్తున్నాను. తలైవి ట్రయిలర్ మైండ్ బ్లోయింగ్. స్వర్గంలో ఉన్న జయలలిత కూడా దీన్ని చూసి ఆశ్చర్యానికి గురవుతారు" అని వ్యాఖ్యానించారు.
దీనికి కంగనా కూడా తనదైనశైలిలో స్పందించింది. "హాయ్ సార్. నేను మిమ్మల్ని ఏ విషయంలోనూ వ్యతిరేకించడం లేదు. గర్వం, ఈగో నిండిపోయిన ఈ ప్రపంచం ఎంతో సులువుగా మనసులను బాధిస్తుంది. ఈ సమయంలో మీరు చూపే దృక్పథాన్ని నేను అభినందిస్తాను. మీరుదేన్నీ సీరియస్‌గా తీసుకోరు. మిమ్మల్ని మీరు కూడా. మీ పొగడ్తలకు కృతజ్ఞతలు" అని వ్యాఖ్యానించింది.