బాక్సాఫీస్ వద్ద 'కల్కి' కలెక్షన్ల వర్షం.. 4 రోజుల్లో రూ.500 కోట్ల కలెక్షన్లు!!

అమితాబ్, కమల్ హాసన్, ప్రభాస్, దీపికా పదుకొణెలు కలిసి నటించిన చిత్రం కల్కి. నాగ్ అశ్విన్ దర్శకుడు. వైజయంతీ మూవీస్ బ్యానరుపై ప్రముఖ నిర్మాత అశ్వనీదత్ నిర్మించారు. ఈ చిత్రం ఈ నెల 27వ తేదీన ప్రపంచ వ్యాప్తంగా విడుదలై కలెక్షన్ల వర్షం కురిపిస్తుంది. ఫలితంగా ఈ చిత్రం విడుదలైన కేవలం నాలుగు రోజుల్లోనే రూ.500 కోట్ల వసూళ్లను రాబట్టింది. 

పురాణాలను, సైన్సును ముడిపెడితూ తీసిన ఈ చిత్రం ప్రపంచవ్యాప్తంగా ప్రేక్షకులను విశేషంగా ఆకట్టుకుంటుంది. ఈ మేరకు చిత్ర నిర్మాణ సంస్థ వైజయంతీ మూవీస్ ఎక్స్(ట్విటర్ వేదికగా పోస్టు చేసింది. విడుదలైన తొలిరోజే 191.5 కోట్లు వసూలు చేసి రికార్డు సృష్టించిన ఈ మూవీ వారంతానికి రూ.500 కోట్ల క్లబ్‌లో చేరిపోయింది. దీంతో కల్కి చిత్రం వసూళ్లపై ప్రభాస్ అభిమానులు సామాజిక మాధ్యమాల్లో హోరెత్తిస్తున్నారు.

అగ్ర తారలు అమితాబ్ బచ్చన్, కమల్ హాసన్, దీపికా పదుకొణె తదితర భారీ తారాగణం నటించిన ఈ చిత్రంపై అన్ని చిత్రసీమలకు చెందిన పలువురు ప్రముఖులు ప్రశంసల జల్లు కురిపిస్తున్నారు. చిరంజీవి, రజనీకాంత్, మోహన్ బాబు, అల్లు అర్జున్ తదితరులు 'కల్కి' ఓ అద్భుతమని పేర్కొన్నారు. 

ముఖ్యంగా ప్రభాస్, అమితాబ్ బచ్చన్ మధ్య ఉన్న యాక్షన్ సన్నివేశాలు, విజువల్ వండర్ దృశ్యాలు ప్రేక్షకులను విపరీతంగా ఆకట్టుకుంటున్నాయి. మరోవైపు ఈ చిత్రంతో పురాణాలను భాగం చేయడంతో కర్ణుడికి సంబంధించి చరిత్ర విశేషాల వీడియోలు, రీల్స్ సామాజిక మాధ్యమాల్లో తెగ చక్కర్లు కొడుతున్నాయి. ఇక 'కల్కి' చూసినవాళ్లు.. పార్ట్-2పై ఎప్పుడు వస్తుందా అని చర్చించుకుంటున్నారు.