బాలీవుడ్ స్టార్ హృతిక్ రోషన్ మరదలి ఇంట్లో కరోనా వెలుగులోకి వచ్చింది. నటుడు సంజయ్‌ఖాన్ కూతురు, హృతిక్ రోషన్ మాజీ భార్య సుజేఖాన్‌ సోదరి ఫరాఖాన్ అలీ నివాసంలో కరోనా కలకలం చెలరేగింది. ఆమె ఇంట్లో పనిచేసే సిబ్బందిలో ఒకరికి కరోనా సోకినట్లు నిర్ధారణ అయింది. దీంతో వెంటనే అతన్ని ఆసుపత్రికి తరలించగా తన కుటుంబ సభ్యులు కోవిడ్‌-19 పరీక్షలు చేయించుకున్నారని ఫరాఖాన్ అలీ ట్విటర్‌లో వెల్లడించారు.
ప్రస్తుతం తామంతా స్వీయనిర్బంధం విధించుకున్నట్లు అలీ పేర్కొన్నారు. దీనికి నటి పూజా బేడీ స్పందిస్తూ.. ధృడంగా ఉంటూ, పాజిటివ్ దృక్పథంతో ముందుకు వెళ్లండని ధైర్యం చెప్పింది. దీంతో ఎందరో నెటిజన్లు సైతం ఆమెకు మద్దతుగా సందేశాలను పంపిస్తున్నారు.
కాగా ఇప్పటికే బాలీవుడ్‌లో నిర్మాత కరీం మొరానీ కుటుంబం కరోనా విషవలయంలో చిక్కుకున్న సంగతి తెలిసిందే. దీని నుంచి అతని ఇద్దరు కుమార్తెలు బయటపడి ఆసుపత్రి నుంచి డిశ్చార్జి కాగా కరీం మొరానీకి రెండోసారి కూడా కరోనా పాజిటివ్ అని తేలింది.