పవర్ స్టార్ పవన్ కళ్యాణ్ వరుస చిత్రాలకు కమిట్ అవుతున్నారు. ఇప్పటికే ఆయన "హరిహర వీరమల్లు" చిత్రంలో నటిస్తున్నారు. ఈ చిత్రం షూటింగ్ పూర్తికాకముందే మరో చిత్రాన్ని ప్రారంభించారు. ప్రముఖ నిర్మాత డీవీవీ దానయ్య డీవీవీ ఎంటర్‌టైన్మెంట్స్ బ్యానరుపై ప్రొడక్షన్ నెంబర్ 6గా నిర్మించే చిత్రంలో పవన్ హీరోగా నటిస్తున్నారు.
ఈ చిత్రానికి లోగడ ప్రభాస్ హీరోగా "సాహో" చిత్రానికి దర్శకత్వం వహించిన సుజిత్‌ను దర్శకుడిగా ఎంపిక చేశారు. ఈ చిత్రం ప్రారంభోత్సవ పూజా కార్యక్రమం సోమవారం హైదరాబాద్ నగరంలో జరుగగా, ఇందుకు పవన్ కళ్యాణ్ హాజరయ్యారు.
అయితే, ఈ చిత్రంలో హీరోయిన్ ఎవరు, ప్రతినాయకుడు ఎవరు, చిత్రానికి పనిచేసే సాంకేతిక నిపుణులు, రెగ్యులర్ షూటింగ్ ఎప్పటి నుంచి మొదలవుతుంది ఇత్యాది విషయాలపై ఓ క్లారిటీ రావాల్సివుంది. "సాహో" సినిమా తర్వాత దర్శకుడు సుజిత్ మరో చిత్రానికి దర్శకత్వం వహించలేదు. చాలా గ్యాప్ తర్వాత భారీ ప్రాజెక్టునే భుజాలకు ఎత్తుకున్నారు.
కాగా, డీవీవీ ఎంటర్‌టైన్మెంట్స్ గతంలో అనేక విజయవంతమైన చిత్రాలను నిర్మించింది. తాజాగా "ఆర్ఆర్ఆర్" చిత్రాన్ని కూడా ఈ సంస్థే నిర్మించింది. ఇపుడు పవర్ స్టార్ పవన్ కళ్యాణ్‌తో తొలి చిత్రానికి శ్రీకారం చుట్టింది.