చిక్కుల్లో పడిన వర్మ హీరోయిన్ ... పలు సెక్షన్ల కింద కేసులు...

'రంగీలా' చిత్రంతో ఓ ఊపు ఊపిన హీరోయిన్ ఊర్మిళ. ఈ ఒక్క చిత్రంతో ఈమె వివాదాస్పద దర్శకుడు రాంగోపాల్ వర్మ హీరోయిన్‌గా గుర్తింపు పొందింది. ఆ తర్వాత అనేక బాలీవుడ్ చిత్రాల్లో నటించి మంచి గుర్తింపు పొందింది. ఆ తర్వాత సినీ ఇండస్ట్రీకి దూరమైంది. ఇటీవలే ఆమె కాంగ్రెస్ పార్టీ తీర్థం పుచ్చుకుంది. 

అయితే, ఆమె హిందూ మతాన్ని కించపరిచేలా వ్యాఖ్యలు చేశారంటూ బీజేపీ అధికార ప్రతినిధి సురేష్ నఖువా తాజాగా పోలీసులకు ఫిర్యాదు చేశారు. తాను టీవీలో ఊర్మిళ ప్రసంగం వింటూ ఆమె చేసిన వ్యాఖ్యల పట్ల దిగ్భ్రాంతికి గురయ్యానని సురేష్ అందులో పేర్కొన్నారు. 

హిందుత్వం ఈ ప్రపంచంలో అత్యంత ప్రమాదకరమతం అంటూ ఊర్మిళ అనడం దేశవ్యాప్తంగా ఉన్న హిందువులను కించపర్చడమేనని సురేష్ తెలిపారు. కాంగ్రెస్ నేతలు హిందువులను ఉగ్రవాదులుగా చూస్తున్నారని మండిపడ్డారు. ఈ మేరకు పోలీసులకు ఫిర్యాదు చేయగా, ఐపీసీ సెక్షన్ 295ఏ, సెక్షన్ 505, సెక్షన్ 34 కింద ఊర్మిళపై కేసు నమోదైంది.

అంతేకాదు, కాంగ్రెస్ అధితనే రాహుల్ గాంధీపైనా, ఊర్మిళ వ్యాఖ్యలను ఖండించకుండా అనుమతించిన టీవీ చానల్ యాంకర్ పైనా సురేష్ నఖువా ఫిర్యాదు చేశారు. హిందుత్వ వ్యతిరేక వ్యాఖ్యలు చేసేలా కాంగ్రెస్ నేతలను రాహుల్ ప్రోత్సహిస్తున్నారని, ఊర్మిళ వ్యాఖ్యల పట్ల అభ్యంతరం చెప్పకపోవడం ద్వారా టీవీ చానల్ యాంకర్ సమ్మతి తెలిపినట్టయిందని సురేష్ పేర్కొన్నారు.