పవర్ స్టార్ పవన్ కళ్యాణ్ అభిమానులకు ఇది నిజంగానే చేదువార్తే. పవన్ - రానా కలిసి నటిస్తున్న మల్టీస్టారర్ మూవీ 'భీమ్లా నాయక్' చిత్రం విడుదల మరోమారు వాయిదాపడింది. సాగర్ కె.చంద్ర దర్శకత్వం వహిస్తున్న ఈ చిత్రాన్ని త్రివిక్రమ్ శ్రీనివాస్‌ మాటలు సమకూర్చి, పర్యవేక్షణ చేస్తున్నారు. ఇప్పటికే ఈ చిత్రంలోని పాటలన్నీ ఓ మోత మోగిస్తున్నాయి.
అయితే, ఈ చిత్రం సంక్రాంతి కానుకగా జనవరి 12వ తేదీన రిలీజ్ చేయనున్నట్టు ప్రకటించారు. ఆ తర్వాత థియేటర్ల సమస్యతో పాటు ఇతర కొన్ని కారణాల రీత్యా వెనక్కితగ్గినట్టు పుకార్లు వచ్చాయి. అయితే, నిర్మాత సూర్యదేవర నాగవంశీ మాత్రం ఈ పుకార్లను కొట్టివేస్తూ జనవరి 12వ తేదీనే రిలీజ్ చేస్తామని ప్రకటించారు. దీంతో పవన్ ఫ్యాన్స్ ఆనందానికి అవధుల్లేకుండా పోయాయి.
ఈ నేపథ్యంలో 'భీమ్లా నాయక్' చిత్రం వాయిదాపడినట్టు వార్తలు వస్తాయి. సంక్రాంతి బరినుంచి తప్పుకుని ఫిబ్రవరి 25వ తేదీకి వాయిదాపడినట్టు ఫిల్మ్ నగర్‌లో వార్తలు చక్కర్లు కొడుతున్నాయి. ఈ వార్త నెట్టింట్లో వైరల్‌గా మారడంతో నేడు ఈ పుకార్లపై నిర్మాత స్పందించే అవకాశం ఉంది. అయితే, చిత్రాన్ని శివరాత్రికి విడుదల చేసే అవకాశం ఉన్నట్టు వార్తలు వస్తున్నాయి.