టాలీవుడ్‌లో లేడీ ఓరియెంటెడ్ సినిమాలకి కేరాఫ్ అడ్రస్‌గా నిలిచిన హీరోయిన్ అనుష్క శెట్టి. చారిత్రాత్మక పాత్రలలో ఇట్టే ఒదిగిపోయే అతి కొద్ది మంది కథానాయికలలో ప్రధానంగా వినపడే పేరు అనుష్క. హీరోలకు ధీటుగా ఫ్యాన్ ఫాలోయింగ్ ఉన్న ఈ భామ సినీ కెరీర్ మొదలై 14 వసంతాలు పూర్తవుతోంది. ఈ సందర్భంగా తన ఆనందాన్ని వీడియో రూపంలో ఇన్‌స్టాగ్రామ్‌లో పోస్ట్ చేసి అభిమానులతో షేర్ చేసుకుంది.
'నేను సినిమాల్లోకి రావడం యాదృచ్ఛికం. డైరెక్టర్ పూరీ జగన్నాథ్ ‘సూపర్‌’ సినిమాలో సెకండ్ హీరోయిన్ కోసం వెతుకుతుంటే నాకు తెలిసిన ఆయన ఫ్రెండ్‌ నా గురించి చెప్పినప్పుడు పూరి సర్ పిలవడంతో హైదరాబాద్‌కు వచ్చాను. అలా ఆ అవకాశంతో కెమెరా ముందుకు వచ్చాను, ఇప్పటికి 14 ఏళ్లు పూర్తవుతోంది, నా జీవితాన్ని ఇంతగా మార్చడానికి సమయం వెచ్చించిన వారందరికీ, నాగార్జున, పూరీ జగన్నాథ్, నా కుటుంబం, స్నేహితులు, అభిమానులకు ధన్యవాదాలు' అంటూ ఆనందంతో వీడియోను పోస్ట్ చేసారు. కొంత విరామం తర్వాత అనుష్క ప్రస్తుతం హేమంత్‌ మధుకర్‌ తీస్తున్న ‘సైలెన్స్‌’ సినిమాలో నటిస్తున్నారు.