బాలయ్య నటించిన అఖండ సినిమాను చూసేందుకు అఘోరాలు తరలివచ్చారు. ఇప్పటికే అఖండ సినిమా కలెక్షన్ల పరంగా దుమ్మురేపుతోంది. బాలయ్య అఘోర రూపం చూసి ఫ్యాన్స్ బ్రహ్మరథం పడుతున్నారు. ఈ నేపథ్యంలో అభిమానులే కాదు.. శనివారం కొందరు అఘోరాలూ సినిమా చూసేందుకు వచ్చారు.
విశాఖపట్నం జిల్లా నర్సీపట్నంలోని బంగార్రాజు థియేటర్‌లో సందడి చేశారు. అఘోరాలూ బాలయ్య ఫ్యాన్స్ అయ్యారంటూ అభిమానులు కేకలేశారు. సినిమా అనంతరం బాలయ్య అభిమానులతో అఘోరాలు కాసేపు ముచ్చటించి అక్కడి నుంచి వెళ్లిపోయారు.
ఇకపోతే.. బాలకృష్ణ, బోయపాటి శ్రీను కాంబినేషన్లో వచ్చిన 'అఖండ' సినిమా ఘన విజయం సాధించింది. సినిమా విడుదలైన తొలిరోజు భారీ వసూళ్లను రాబట్టింది.
మరోవైపు ఈ చిత్రానికి వచ్చిన రెస్పాన్స్‌పై బాలకృష్ణ హర్షం వ్యక్తం చేశారు. ఒకప్పుడు భక్తిని రామారావు బతికించారని, ఇప్పుడు భక్తిని 'అఖండ' బతికించిందని చెప్పారు. 'అఖండ' సాధించిన విజయం మొత్తం సినీ పరిశ్రమ విజయమని బాలయ్య చెప్పారు.
తెరపై తన నటనను చూసి తానే కాస్త ఆశ్చర్యపోయానని అన్నారు. తాను కేవలం తన దర్శకుడి సూచనలను పాటిస్తానని... తనకు ప్రతి సినిమా సమానమేనని చెప్పారు. ఈ చిత్రానికి తమన్ అందించిన సంగీతం అద్భుతమని అన్నారు.