యంగ్ టైగర్ ఎన్‌టీఆర్ వరుస విజయాలతో దూసుకెళ్తున్నారు. ప్రస్తుతం అతడు దర్శక ధీరుడు రాజమౌళి దర్శకత్వంలో ఆర్ఆర్ఆర్ సినిమాను ప్రతిష్టాత్మకంగా తెరకెక్కిస్తున్నారు. ఇందులో కొమరం భీం పాత్రలో ఎన్‌టీఆర్ చేస్తున్న సంగతి తెలిసిందే. ఈ సినిమా తరువాత ఎన్‌టీఆర్ మాటల మాంత్రికుడు త్రివిక్రమ్ దర్శకత్వంలో అయినను పోయిరావలె హస్తినకు అనే సినిమాను చేయనున్నారు.
ఈ సినిమా తరువాత ఎన్‌టీఆర్ చేయనున్న సినిమాపై అనేక ఊహాగానాలు వస్తున్నాయి. ఈ క్రమంలో దర్శకులుగా ప్రశాంత్ నీల్, అట్లీ, లోకేష్ కనగరాజ్ ఇలా చాలా మంది పేర్లు వినిపిస్తున్నాయి. తాజాగా మరో వార్త తెగ హల్‌చల్ చేస్తోంది. యంగ్ టైగర్ ఎన్‌టీఆర్ తన తదుపరి చిత్రం తరువాత హాలీవుడ్ ఎంట్రీ ఇచ్చేందుకు సిద్దమవుతున్నారట. ఈ క్రమంలో ఇండో అమెరికన్ దర్శకుడితో సంప్రదింపులు కూడా జరిగాయని వార్తలు వస్తున్నాయి.
హాలీవుడ్ డైరెక్టర్ మనోజ్ నైట్ శ్యామలన్ తన సినిమాలో ఎన్‌టీఆర్‌ను అనుకున్నారని సినీ సర్కిల్స్‌లో గుసగుసలు వినిపిస్తున్నాయి. ఇతడు ఇప్పటికే హాలీవుడ్‌లో చాలా బ్లాక్ బస్టర్ సినిమాలను తెరకెక్కించారు. వాటిలో అన్‌బ్రేకబుల్, స్ప్టిట్, ది సిక్స్త్ సెన్స్, గ్లాస్ సినిమాలు ఉన్నాయి. ఈ వార్త ఎంతవరకు నిజమనేది తెలీదు కానీ ఇది నిజం కావాలని ఎన్‌టీఆర్ అభిమానులు కోరుకుంటున్నారు. మరి ఇది నిజమవుతుందా లేదా అనేది తెలియాలంటే కొంతకాలం వేచి చూడాల్సిందే.