మెగాస్టార్ అల్లుడుకి నటి మెహ్రీన్ షాక్... నేను చేయను... అడ్వాన్స్ తిరిగివ్వను...

టాలీవుడ్ ఇండస్ట్రీలో ఇప్పుడిప్పుడే మంచి ఊపు మీదున్న నటి మెహ్రీన్, పులి వాసు దర్శకత్వంలో ఓ చిత్రాన్ని చేస్తోంది. ఐతే ఉన్నట్లుండి నిర్మాతకు షాకిచ్చిందట. హీరోను మార్చేసి మీ ఇష్టం వచ్చినట్లు చేస్తే నటించడానికి నేను తేరగా వున్నానా అంటూ మండిపడుతోందట. అసలు విషయం ఏంటయా అంటే.. మెగాస్టార్ చిరు చిన్నల్లుడు కళ్యాణ్ దేవ్ హీరోగా ఇటీవలే ఓ సినిమా స్టార్ట్ అయింది కదా. ఈ చిత్రాన్ని తొలుత సుధీర్ బాబు హీరోగా ప్రియా వారియర్ హీరోయిన్‌గా చేయాలని అనుకున్నారట.

ఏమైందో తెలియదు కానీ... ప్రియా వారియర్ ఈ చిత్రాన్ని తను చేయడం లేదని అడ్డం తిరిగిందట. దానితో ఆ పాత్రలో మెహరీన్‌ను తీసుకున్నారట. ఇందుకు గాను ఆమెకు 30 లక్షల పారితోషికం ఇస్తామని ఒప్పందం కూడా కుదుర్చుకున్నారట. అడ్వాన్సుగా రూ. 10 లక్షలు ఇచ్చారట. ఐతే ఎందుకో తెలియదు కానీ సుధీర్ బాబు కూడా తను ఈ చిత్రంలో హీరోగా చేయనని హ్యాండిచ్చాడట. దానితో మెగాస్టార్ అల్లుడు కల్యాణ్ దేవ్‌ను సంప్రదించి ఆయన్ని ఓకే చేశారట. 

ఈ విషయం తెలిసిన మెహ్రీన్... మీ ఇష్టం వచ్చినట్లు హీరోను మార్చేసి నటించమంటే నటించడానికి నేనేమి తేరగా లేనంటూ మండిపడుతోందట. ముందుగా చెప్పినట్లు కాకుండా ఇలా మార్పులు చేసినందుకు తను నటించననీ, అలాగే తనకు ఇచ్చిన అడ్వాన్సు కూడా తిరిగి ఇవ్వనని అంటున్నట్లు టాలీవుడ్ సినీ జనం చెప్పుకుంటున్నారు. ఐతే నిర్మాత మాత్రం... మెహ్రీన్ నటించి తీరాల్సిందేనంటూ పట్టుబడుతున్నాడట. మరి ఇందులో ఎంతవరకు నిజం వుందో తెలియాల్సి వుంది.