"ఆచార్య" విడుదలకు అడ్డుపడుతున్న కరోనా!

మెగాస్టార్ చిరంజీవి నటించిన తాజా చిత్రం "ఆచార్య". కొరటాల శివ దర్శకత్వం వహించారు. ఈ చిత్రం రిలీజ్‌ వాయిదా పడుతుందని కొన్ని రోజులుగా వార్తలు వస్తున్నాయి. అవి ఇపుడు నిజమయ్యేలా కనిపిస్తున్నాయి. 

ఆ చిత్రం కోసం మెగా అభిమానులు కళ్లు కాయలు కాచేలా వేచి చూస్తున్నారు. ఇప్పటికే సినిమా షూటింగ్ కూడా చివరి దశకు వచ్చింది. పైగా ఈ సినిమాలో రామ్ చరణ్ కూడా నటిస్తుండటంతో అంచనాలు మరింత పెరిగాయి. దానికి తోడు మొన్న విడుదలైన 'లాహే లాహే' పాట యూ ట్యూబ్‌లో ట్రెండ్ అవుతుంది. 

గేయ రచయిత రామజోగయ్య శాస్త్రి రాసిన ఈ పాటను సాహితీ చాగంటి, హారిక నారాయణ్ పాడారు. ఈ పాటతో పాటు టీజర్‌కు కూడా అద్భుతమైన రెస్పాన్స్ వచ్చింది. మరోవైపు ప్రీ రిలీజ్ బిజినెస్ కూడా రూ.100 కోట్లకు పైగా జరుగుతుంది. కోవిడ్ తర్వాత తెలుగులో విడుదలవుతున్న భారీ సినిమాల్లో 'ఆచార్య' ముందు వరుసలో ఉంటుంది. 

మే 13న ఈ సినిమాని ప్రేక్షకుల ముందుకు తీసుకురానున్నట్లు ప్రకటించారు దర్శక నిర్మాతలు. కానీ ప్రస్తుతం పెరుగుతున్న కరోనా కేసుల నేపథ్యంలో 'ఆచార్య' సినిమా రిలీజ్‌ వాయిదా వేస్తున్న‌ట్లు తెలుస్తోంది. ఇప్పటికే శేఖర్ కమ్ముల తెరకెక్కించిన 'లవ్ స్టోరీ' కూడా వాయిదాపడిన విషయం తెల్సిందే.