కొంప ముంచిన బుల్లెట్ బండి : డ్యాన్స్ అదరగొట్టిన నర్సు.. కలెక్టర్ సీరియస్

తెలంగాణ రాష్ట్రంలో బుల్లెట్ బండి పాట ఇపుడు వైరల్‌గా మారింది. 'బుల్లెట్ బండెక్కి వచ్చేస్తావా' పాట సోషల్ మీడియాను ఊపేస్తోంది. ఈ పాటపై పెళ్లి బారాత్‌లో వధువు తన భర్త ముందు డ్యాన్స్ చేస్తున్న వీడియో సోషల్ మీడియాను షేక్ చేస్తోంది. అలాగే, యూట్యూబ్‌లోనూ ఈ పాట హల్ చల్ చేస్తోంది. 

ఈ నేపథ్యంలో రాజన్న సిరిసిల్ల జిల్లా తంగళ్ళ పల్లి పిహెచ్‌సీలో బుల్లెట్ బండి పాటపై ఆస్పత్రి సిబ్బంది నృత్యం చేస్తున్న వీడియో బయటకి వచ్చింది. ఇది కూడా సోషల్ మీడియాలో వైరల్ అవుతోంది. 

ఈ ప్రాథమిక ఆస్పత్రి సిబ్బంది డ్యాన్స్ చేస్తున్న వీడియోపైను చూసిన జిల్లా కలెక్టర్ ఆగ్రహం వ్యక్తం చేశారు. దీనిపై విచారణకు ఆదేశించారు. అంతేకాదు విధుల్లో నిర్లక్ష్యంగా ఉన్నందుకు జిల్లా వైద్యాధికారి సుమన్ రావు మెమో జారీ చేశారు. విచారణ అనంతరం చర్యలు తీసుకోనున్నారు.