ప్రియురాలిని తీసుకొచ్చాడు, తాళి కట్టేద్దామనుకునేలోపు పిచ్చకొట్టుడు కొడుతూ...

ఇద్దరూ ప్రేమించుకున్నారు. కానీ కులాలు వేరు కావడంతో వారి పెళ్లికి పెద్దలు ససేమిరా అన్నారు. దీనితో ఇద్దరూ ఇళ్ల నుంచి పారిపోయి హైదరాబాదులోని ఆర్యసమాజ్‌లో పెళ్లి చేసుకోవాలని నిశ్చయించుకున్నారు. ఐతే కాచిగూడలో తన కుమార్తెతో యువకుడు వున్నాడని తెలుసుకున్న యువతి బంధువులు వారిపై మెరుపుదాడి చేసి కారులో కిడ్నాప్ చేసి దారి పొడవునా ఇరువురికీ దేహశుద్ధి చేసారు.

వివరాల్లోకి వెళితే... నారాయణపేట జిల్లా బండగొండ గ్రామానికి చెందిన 23 ఏళ్ల శివశంకర్ గౌడ్ అదే ప్రాంతానికి చెందిన యువతిని ప్రేమించాడు. ఐతే వీరివురి కులాలు వేరు కావడంతో పెద్దలు అడ్డు చెప్పారు. దీనితో ఆర్యసమాజ్ లో వివాహం చేసుకుందామని ఇద్దరూ ఇంటి నుంచి వచ్చేసారు. కానీ యువతి తరపు బంధువులు వారి ఆచూకి కనుగొని కారులో కిడ్నాప్ చేశారు.

నగరంలోని వివిధ రోడ్లలో తిప్పుతూ అతడిపై దాడి చేసి చిత్రహింసలకు గురిచేసారు. చివరికి అతడిని పోలీసులకు అప్పగించి యువతిని తమతో తీసుకెళ్లిపోయారు. కాగా యువతి స్నేహితురాలు పోలీసులకు ఫిర్యాదు చేయడంతో అసలు విషయం బయటకు వచ్చింది. కేసు నమోదు చేసుకున్న పోలీసులు దాడి చేసిన వ్యక్తులను అరెస్టు చేసారు. మరో ఇద్దరు పరారీలో వున్నారు. వారి కోసం గాలిస్తున్నారు.