కాంట్రాక్టర్లకు పోలీసులు సలాం కొడుతూ ఉన్నారు. వాళ్ల కోసం ఏమైనా చేసేందుకు వెనుకాడడం లేదు. కాంట్రాక్టర్లకు సంబంధించిన వ్యక్తిగత విషయాల్లో ప్రత్యేక శ్రద్థ తీసుకుంటున్నారు. ఇలాంటి ఘటనే కరీంనగర్ జిల్లా మానకొండూరులో వెలుగు చూసింది. ఓ కాంట్రాక్టర్ జన్మదిన వేడుకలను ఏకంగా సిఐ కేబిన్‌లోనే నిర్వహించారు. అన్నీ తానై వ్యవహరించిన సిఐ ఇంద్రసేనారెడ్డి కాంట్రాక్టర్‌ను పూలతో ముంచెత్తారు. కేక్ కట్ చేసి సంబరాలు సైతం జరుపుకున్నారు.
వీనవంకం మండలం గంగారాం గ్రామానికి చెందిన నల్ల రవీంద్రారెడ్డి పుట్టిన రోజు వేడుకలు వైభవంగా జరిపారు. సిఐ రవీంద్రరెడ్డి ఆధ్వర్యంలో నిర్వహించిన ఈ వేడుకల్లో కాంట్రాక్టర్ పేరులో ఉన్న ఒక అక్షరం పేరుతో ఉన్న కేక్‌లను కట్ చేశారు. పోలీసులంతా ఈ వేడుకల్లో పాల్గొని కాంట్రాక్టర్‌కు కేక్ తినిపించారు. కాంట్రాక్టర్లకు కేక్ తినిపించేందుకు పోలీసులంతా పోటీలు పడ్డారు.
ఈ నెల 4వ తేదీన జరిగిన ఈ వేడుకలకు సంబంధించిన వార్త కాస్తంత ఆలస్యంగా బయటకు వచ్చింది. అయితే కాంట్రాక్టర్ సిఐ చిన్నమ్మ కుమారుడిగా తెలుస్తోంది. ఎవరైనాసరే పోలీస్టేషన్లో బహిరంగంగా పుట్టినరోజు వేడుకలు జరుపుకోవడంపై విమర్శలు వ్యక్తమవుతున్నాయి.