ముస్లింలకు అధికంగా పిల్లలున్నారా? మోదీ గారూ ఏం మాట్లాడుతున్నారు?

రాజస్థాన్‌లో ఎన్నికల ప్రచారం నిర్వహిస్తోన్న ప్రధాని మోదీ ముస్లింలను ఉద్దేశించి వివాదాస్పద వ్యాఖ్యలు చేశారు. భారత్‌లోకి చొరబడేవారు ముస్లింలని చెబుతూ... ఇండియా కూటమి దేశంలోని సంపదను అధికంగా పిల్లలున్న ముస్లిం కుటుంబాలకు పంచేందుకు సిద్ధమైందనే వ్యాఖ్యలు చేశారు. అంతేకాదు దేశ వనరులపై తొలి హక్కు ముస్లింలకే ఉంటుందన్న మాజీ ప్రధాని మన్మోహన్ సింగ్ వ్యాఖ్యలను ఈ సందర్భంగా మోదీ గుర్తు చేశారు.

అయితే ముస్లింలకు ఎక్కువ మంది పిల్లలు ఉన్నవారిపై ప్రధాని నరేంద్ర మోదీ చేసిన వ్యాఖ్యలపై ఏఐఎంఐఎం అధ్యక్షుడు అసదుద్దీన్ ఒవైసీ మండిపడ్డారు. మోదీ భారతీయ ముస్లింలను ఎందుకు ద్వేషిస్తున్నారని, వారిని లక్ష్యంగా చేసుకున్నారని, అయితే దుబాయ్, సౌదీ అరేబియాలో ఉన్న వారితో ఎందుకు సంతోషంగా ఉన్నారని ఒవైసీ ప్రశ్నించారు. 

పెద్ద కుటుంబాల ప్రస్తావనపై ఒవైసీ మాట్లాడుతూ, మోదీకి ఆరుగురు సోదరులు, అమిత్ షాకు ఆరుగురు సోదరీమణులు, రవిశంకర్ ప్రసాద్‌కు ఏడుగురు సోదరులు, సోదరీమణులు ఉన్నారని అన్నారు. బంగ్లాదేశ్ నుండి పెరిగిన చొరబాట్లపై మోదీ చేసిన వ్యాఖ్యలపై కూడా ఆయన విరుచుకుపడ్డారు. 

2014 జూలై 15 నుంచి మోదీ ప్రభుత్వం తమ వద్ద చొరబాటుదారులపై ఎలాంటి డేటా లేదని పార్లమెంట్‌లో పేర్కొంది. వివిధ వర్గాల మధ్య చీలికలు సృష్టించడం ద్వారా మోదీ విభజనకు ప్రయత్నిస్తున్నారని ఆరోపించిన ఒవైసీ, ఉత్తర భారతదేశంతో పోలిస్తే దక్షిణ భారతదేశంలోని మహిళల్లో సంతానోత్పత్తి రేటు చాలా తక్కువగా ఉందని అన్నారు. 

జాతీయ జీడీపీకి దక్షిణ భారత రాష్ట్రాలు, ముంబై సహకారం ఉత్తర భారత రాష్ట్రాల కంటే ఎక్కువ. దక్షిణాది ప్రజలు దీన్ని సమస్యగా మారుస్తారా అని ఒవైసీ మోదీని ప్రశ్నించారు.