హెచ్1బీ వీసా ఉన్నవారి పిల్లలకు కూడా ఉన్నత విద్యాసంస్థల్లో ఉచిత విద్య కోసం అమెరికాలోని నూజెర్సీ రాష్ట్రం చట్టం చేసింది. ఆ రాష్ట్ర గవర్నర్‌ ఫిల్‌ మర్ఫీ ఈ బిల్లుపై మంగళవారం సంతకం చేశారు. ఈ నిర్ణయాన్ని న్యూజెర్సీలో ఉన్న భారతీయులు స్వాగతించారు. పిల్లల విద్య విషయంలో తమకు ఆర్థికంగా వెసులుబాటు లభిస్తుందని సంతోషం వ్యక్తం చేశారు.
అమెరికాలో ట్రంప్‌ సర్కారు వలస చట్టాలను కఠినతరం చేస్తున్న నేపథ్యంలో ఈ చట్టాన్ని తీసుకురావడం గమనార్హం. ‘‘ఉన్నత విద్యను పొందడానికి న్యూజెర్సీ వాసులందరూ అర్హులే. అందులో భాగంగానే ఈ చట్టాన్ని తీసుకొస్తున్నాం. విద్యార్థులు తమ లక్ష్యాలను అందుకోవడానికి, వారి ఉజ్వల భవిష్యత్తుకు ఈ చట్టం దోహదం చేస్తుంది’’ అని బిల్లుపై సంతకం చేస్తున్న సందర్భంలో మర్ఫీ అన్నారు.