బొద్దింకలంటే భార్యకు భయం.. 18సార్లు ఇల్లు మారాను.. ఇక వేగలేను.. విడాకులు ఇప్పించండి..

భర్త సాఫ్ట్‌వేర్ ఉద్యోగి. పెళ్లైన కొన్ని రోజులకు భార్య వంటగదిలో పెద్ద పెద్దగా గా కేకలు పెట్టింది. దీంతో ఇంట్లో ఏదో పనిలో ఉన్న భర్త హడలిపోయాడు. పరుగు పరుగున వెళ్లి చూశాడు. ఏమిటా అని ఆరా తీస్తే.. ఓరి  నాయనోయ్.. బొద్దింక.. బొద్దింక.. బొద్దింక..అంటూ కళ్ళు పెద్దవి చేసి వణికిపోతూ కనిపించింది. నిలబడిన స్థలం నుంచి ఒక్క అడుగు కూడా కదలకుండా వణికిపోతూ నిలబడిపోయింది. బాబోయ్.. వంటగదిలో బొద్దింకలున్నాయి.. నేను ఛస్తే కిచెన్ లోకి వెళ్లనని తేల్చి చెప్పేసింది. వేరే ఇల్లు మారదామని పట్టుబట్టింది.

అలా మరో ఇంటికి మారారు. అక్కడ కూడా ఇదే సమస్య. మళ్లీ ఇంకో ఇంటికి మారారు. అక్కడ కూడా అదే సమస్య రిపీట్ కావటంతో మరోఇల్లు. ఇలా కేవలం మూడు సంవత్సరాలలో 18 ఇళ్లు మారే వరకు కొనసాగింది. భర్తకు ఇదో పెద్ద సమస్యగా మారింది. ఆఫీసులో కొలీగ్స్ అతనని హేళ చేయడం మొదలెట్టారు. దీంతో అతనికి భార్య భయంపై అసహనం పెరిగిపోయింది.

వెంటనే సైకాలజిస్టుల దగ్గరకు తీసుకెళ్లాడు. కౌన్సెలింగ్ ఇప్పించాడు. కానీ అదే సమస్య మళ్లీ మళ్లీ రావటంతో మరో సైకాలజిస్టు దగ్గరకు తీసుకెళ్లాడు. దీంతో ఆ భార్య భర్తపై మండిపడింది. ఆవేదన చెందింది. దీంతో ఆ భర్తకు ఏం చేయాలో పాలుపోలేదు. ఎంతగా చెప్పినా… ఎంతమందితో చెప్పించినా… భార్యకు బొద్దింకల భయం పోవటంలేదు. దీంతో విసిగిపోయిన భర్త చేసేది లేక ''ఈ బొద్దింకల భయం భార్యతో నేనిక వేగలేను.. నా విడాకులు కావాలంటున్నాడు. 

బొద్దింకలంటే నా భార్యకు ఎంత భయమంటే.. గట్టిగా అరుస్తూ ఇంట్లో సామాన్లను బయటకు విసిరేస్తోంది. ఇక నాకు ఆమెను భరించే ఓపిక లేదు. అందుకే విడాకులకు అప్లై చేశానని చెబుతున్నాడు. మధ్యప్రదేశ్‌లోని భోపాల్‌కు చెందిన ఈ వ్యక్తి ప్రస్తుతం భార్యకు దూరం కావాలనుకుంటున్నాడు. ఈ జంటకు 2017లో వివాహం జరిగింది.