ఒకవైపు మహిళలపై అత్యాచారాలు పెరిగిపోతున్నాయి. మరోవైపు వావివరుసలు మంటగలిసిపోతున్నాయి. తాజాగా సభ్యసమాజం తలదించుకునే ఘటన పశ్చిమబెంగాల్‌లో చోటుచేసుకుంది. అల్లా చెప్పాడని కన్నకూతురునే ఓ దుర్మార్గుడు పెళ్లి చేసుకుని గర్భవతిని చేశాడు. ఇదంతా కన్నతల్లికి తెలిసే చేశాడు. ఈ ఘటన స్థానికంగా కలకలం రేపుతోంది.
వివరాల్లోకి వెళితే.. పశ్చిమ బెంగాల్‌లోని జల్పాయ్ గురి జిల్లా కసియాజోరా గ్రామంలో 36 ఏళ్ల అఫాజుద్దీన్ అనే వ్యక్తి అల్లా ఆదేశించాడని తన 15 ఏళ్ల కుమార్తెను పెళ్లి చేసుకున్నాడు. ఈ పెళ్లికి ఆయన భార్య సకీనా పూర్తి మద్దతు తెలిపింది. బిడ్డ మంచి కోసమే ఇలా చేస్తున్నానని చెప్పడంతో ఆమె మూఢంగా నమ్మేసింది. ఈ విషయాన్ని ముందుగా స్థానికులు గమనించలేదు.
కానీ అఫాజుద్ధీన్ కుమార్తె శరీరంలో మార్పులు గమనించిన కొందరు బాలికను నిలదీయగా అసలు విషయం వెలుగులోకి వచ్చింది. ఈ ఘటనకు సంబంధించి పోలీసులకు సమాచారం అందడంతో అఫాజుద్దీన్‌ను పోలీసులు అరెస్ట్ చేశారు. ఈ సందర్భంగా తన భర్తను సకీనా వెనకేసుకొచ్చింది.
అల్లా చెప్పడం వల్లే తన భర్త ఈ విధంగా చేశాడని, తన భర్త అసత్యాలు పలకడని గొప్పలు చెప్పింది. అయితే ఈ దారుణంపై మహిళా సంఘాలు మండిపడుతున్నాయి. కన్నబిడ్డపై ఈ అఘాయిత్యానికి పాల్పడిన తల్లిదండ్రులను కఠినంగా శిక్షించాలని వారు డిమాండ్ చేస్తున్నారు.