పాము ఇంకా చావలా... తోకలో ప్రాణముంది... కదలాడుతూనే ఉంది... ఇదీ సంగతి!!

విజయ్ కాంత్ కొత్త ఆశలు... తమిళనాడు మున్సిపల్ ఎన్నికల్లో సత్తా చాటుతారట...

మొన్న తమిళనాడు ఎన్నికల్లో దారుణ ఓటమిని చవిచూసింది కెప్టెన్ విజయ్ కాంత్ పార్టీ. ఐతే కెప్టెన్ తాజాగా తన అనుయాయులతో మళ్లీ జోరుగా మంతనాలు సాగిస్తున్నారట. తదుపరి ప్రణాళికలు ఎలా ఉండాలనీ, పార్టీని ఎలా బలోపేతం చేయాలని మాట్లాడుతున్నారుట. అక్టోబరు నెలలో తమిళనాడు మున్సిపల్ ఎన్నికలు వస్తుండటంతో ఆ ఎన్నికల్లో సత్తా చాటాలని శ్రేణులను సమాయత్తం చేస్తున్నారట. 

అంతేకాదు... ఇకపై కూటమితో తెగదెంపులు చేసుకుని ఒంటరిగా పోటీ చేయాలని సూచిస్తున్నారట. ఆయన పిలుపు సంగతి ఏమోగానీ, పార్టీలో పలువురు నాయకులు మాత్రం.. అయ్యా... ఈసారి ఎన్నికల్లో పోటీ చేస్తే పోలింగ్ బూత్ లలో మన మనుషులంటూ దొరికే పరిస్థితి లేదని అన్నారట. దీంతో కెప్టెన్ మరోసారి పళ్లు పటపట కొరికి... ముందు ఆలోచనలు వద్దు... నే చెప్పింది చేయండి అంటూ మండిపడ్డారట. మొత్తానికి వ్యవహారం ఎలా ఉందంటే... పాము చచ్చినా ప్రాణం తోకలో ఇంకా అలా ఉంది అన్నట్లు ఉంది. మరి అక్టోబరు నెలలో ఎలాంటి ఫలితాలను రాబడుతారో వెయిట్ అండ్ సీ.