ప్రస్తుతం దేశంలో కరోనా వైరస్ కల్లోలం సృష్టిస్తోంది. ప్రపంచం యావత్తూ కరోనా నామస్మరణలో మునిగితేలుతోంది. ఈ వైరస్ పేరు చెబితేనే చిన్నాపెద్దా అనే తేడా లేకుండా ప్రతి ఒక్కరూ ప్రాణభయంతో వణికిపోతున్నారు. అందుకే ఈ వైరస్ బారినుంచి ప్రజలను కాపాడేందుకు, వైరస్ వ్యాప్తిని అడ్డుకునేందుకు ఆయా దేశాలు లాక్‌డౌన్‌లు అమలు చేస్తున్నాయి.
ముఖ్యంగా, భారత్ వంటి దేశాల్లో లాక్‌డౌన్‌ను పకడ్బంధీగా అమలు చేస్తున్నారు. ఈ సమయంలో పుట్టిన పిల్లలకు కూడా కరోనా, లాక్‌డౌన్లకు గుర్తుగా ఆ పేర్లను పెడుతున్నారు. ఇప్పటికే కరోనా కుమార్, కరోనా కుమారి, లాక్‌డౌన్, కోవిడ్ అంటూ పేర్లు పెట్టుకున్నారు.
తాజాగా, ఉత్తరప్రదేశ్ రాష్ట్రంలోని సహరాన్ పూర్ జిల్లాలో జన్మించిన బిడ్డకు ఓ తండ్రి విచిత్రమైన పేరు పెట్టారు. నిజానికి కరోనా వైరస్ బారినపడుకుండా ఉండేందుకు సామాజిక భౌతికదూరంతో పాటు.. చేతులకు శానిటైజర్లు పూసుకోవాలని పదేపదే కోరుతున్నారు. దీంతో ఆదివారం జన్మించిన బిడ్డకు ఆ తండ్రి శానిటైజర్ అనే పేరు పెట్టారు.
ఇదే అంశంపై ఆ బిడ్డ తండ్రి ఓమ్ వీర్ మాట్లాడుతూ, కరోనా నుంచి కాపాడుకోవడంలో శానిటైజర్లు కీలకపాత్ర పోషిస్తున్నాయని, ప్రభుత్వాలు కూడా శానిటైజర్లను ఉచితంగా పంపిణీ చేస్తున్నాయని తెలిపాడు. మన చేతులకున్న క్రిములను తొలగించడంలో ప్రధాన పాత్ర పోషించేది శానిటైజర్ అని, దీన్ని ప్రతి ఒక్కరూ ఉపయోగిస్తున్నారని, అందుకే తమ బిడ్డకు 'శానిటైజర్' అని పేరు పెట్టామని చెప్పుకొచ్చాడు.