భార్య అలిగి పుట్టింటికి పోవడంతో ఓ పారిశ్రామికవేత్త.. తన ఇంట్లో పాచిపనిచేసే మహిళ కుమార్తెను రూ.10 లక్షలు వెచ్చించి కొనుగోలు చేశాడు. చివరకు ఈ విషయం బహిర్గతం కావడంతో ఆయనతో పాటు.. కుమార్తెను విక్రయించిన తల్లిదండ్రులను కూడా పోలీసులు అరెస్టు చేశారు. తమిళనాడు రాష్ట్రంలోని సేలం జిల్లాలో వెలుగులోకి వచ్చిన ఈ వివరాలను పరిశీలిస్తే,
సేలం అన్నాదానపట్టికి చెందిన సతీష్‌కుమార్‌(30), సుమతి (26) అనే దంపతులు నివసిస్తున్నారు. వీరికి పదేళ్ల కుమార్తె ఉంది. సుమతి కొన్నేళ్ల క్రితం చెన్నై నగరంలో ఎక్స్‌పోర్ట్‌ కంపెనీ యజమాని కృష్ణన్‌ ఇంటిలో పనిమనిషిగా వుండేది. ఆ తర్వాత ఆమె స్వస్థలానికి తిరిగి వెళ్ళింది. ఆ తర్వాత కృష్ణన్‌ మనస్పర్థల కారణంగా భార్యను విడిచిపెట్టి ఒంటరిగా గడుపుతున్నాడు.
ఈ నేపథ్యంలో గుట్టుచప్పుడు కాకుండా సుమతి తన కుమార్తెను రూ.10 లక్షలకు కృష్ణన్‌కు విక్రయించింది. అయితే సుమతి తల్లి చిన్నపొన్ను ఈ విషయాన్ని పసిగట్టింది. కొద్ది రోజులుగా తన మనమరాలు కనిపించకపోవడంతో అనుమానం వచ్చి పోలీసులకు ఫిర్యాదు చేసింది.
పోలీసులు కేసు నమోదు చేసుకుని విచారణ ప్రారంభించడంతో మొత్తం గుట్టు రట్టయ్యింది. బాలికను విక్రయించిన సుమతి, సతీష్‌కుమార్‌ను, పారిశ్రామికవేత్త కృష్ణన్‌ను పోలీసులు అరెస్టు చేశారు.