తమిళనాడు రాష్ట్రంలోని దిండిగల్ జిల్లాలో దారుణం జరిగింది. ఇంటర్ చదివే విద్యార్థి ఒకరు మృగంలా ప్రవర్తించాడు. మైనర్ బాలికపై అత్యాచారం చేశాడు. తాను చేసిన పాడుపని బయటకు చెపుతుందన్న భయంతో ఆ చిన్నారికి కరెంట్ షాకిచ్చి చంపేశాడు.
తాజాగా వెలుగులోకి వచ్చిన ఈ వివరాలను పరిశీలిస్తే, దిండింగల్ జిల్లా కురుంపట్టికి చెందిన ఓ మైనర్ బాలిక ఏడో తరగతి చదువుతోంది. ఈమె ఇటీవల అనుమానాస్పదస్థితిలో మరణించింది. అయితే, శరీరంపై పలుచోట్ల గాయాలు ఉన్నాయి. ముఖ్యంగా, కరెంట్ షాకిచ్చినట్టుగా గుర్తులు కనిపించాయి. దీంతో ఆ బాలిక తల్లిదండ్రులు పోలీసులకు సమాచారం చేరవేశారు.
వెంటనే పోలీసులు అక్కడకు చేరుకుని మృతదేహాన్ని స్వాధీనం చేసుకుని శవపరీక్ష కోసం ఆస్పత్రికి తరలించారు. ఆ తర్వాత కేసు నమోదు చేసి విచారణ చేపట్టారు. ఈ విచారణలో భాగంగా, స్థానికంగా ఉండే ఓ యువకుడిని అదుపులోకి తీసుకుని విచారించారు.
ఈ విచారణలో తానే ఈ దారుణానికి తెగబడినట్లు బాలుడు అంగీకరించాడు. ఈ నెల 16వ తేదీన బాలిక ఇంట్లో ఉండగా, తాను లైంగిక దాడికి పాల్పడ్డానని చెప్పాడు. ఆ సమయంలో బాలిక ప్రతిఘటించడంతో తీవ్రంగా కొట్టి లొంగదీసుకున్నానని చెప్పాడు. చివరగా తనను పోలీసులకు పట్టిస్తుందన్న భయంతో ఆమె నోట్లో కరెంట్ వైర్లు పెట్టి షాక్ ఇచ్చి చంపేసినట్లు వాంగ్మూలం ఇచ్చాడు. ఈ యువకుడు స్థానికంగా ఉండే ఓ స్కూల్‌లో ఇంటర్ చదువుతున్నాడు.