కొత్తగా పెళ్లైన కానిస్టేబుల్ లీవ్ లెటర్... మంచి మూడ్‌లో ఉన్నానంటూ..

కర్నాటక రాష్ట్రంలోని బేగూర్ పోలీస్ స్టేషన్ పరిధిలో కానిస్టేబుల్‌గా పనిచేస్తున్న మారుతికి ఇటీవల వివాహం జరిగింది. పెళ్లి కోసం ఎక్కువ రోజులే సెలవు తీసుకున్నప్పటికీ పెళ్లికి ముందు పెళ్లి పనులతో, పెళ్లయ్యాక బంధువులంతా ఉండటంతో వారితో గడపడంలో తీసుకున్న సెలవులన్నీ తెలీకుండానే త్వరగా గడిచిపోయాయి.

దీంతో మళ్లీ సెలవు పెట్టాలని నిర్ణయించుకున్న మారుతి పై అధికారికి లీవ్ లెటర్ రాసాడు. ఈ లెటర్‌ను ఎవరో ఫోటో తీసి నెట్‌లో పెట్టడంతో అది చూసిన నెటిజన్లు తెగ నవ్వుకుంటున్నారు.

ఇంతకీ అందులో ఏముందంటే, తనకు ఇటీవల పెళ్లి జరిగిందని, భార్యతో కొన్ని పూజలు చేయాల్సి ఉందని, ఊరిలో కూడా కొన్ని పనులు పూర్తి చేయాల్సి ఉందని లెటర్‌లో రాసాడు. అంతటితో ఆగకుండా… తనకు లేకలేక వివాహమైందని, ఆగలేకపోతున్నాననీ, మంచి మూడ్‌లో ఉన్నానని, తన పరిస్థితి అర్థం చేసుకొని 10 రోజులు సెలవు ఇవ్వాలని లేఖ రాశాడు.

ఈ లెటర్ చదివిన పై అధికారులు నవ్వుకోగా, ఉన్నదున్నట్లుగా చెప్పి సెలవు అడిగినందుకు కొందరు నెటిజన్లు మెచ్చుకుంటుంటే, మరికొంత మంది సెలవు ఇచ్చేయడమే మంచిదంటూ సెటైర్లు వేస్తున్నారు.