ప్రత్యర్థి పార్టీ ఎమ్మెల్యే కుమార్తెతో బీఎస్పీ నేత కుమారుడి వివాహం... మాయావతి ఆగ్రహం!!

ఉత్తరప్రదేశ్ రాష్ట్రంలో సమాజ్‌వాదీ పార్టీ (ఎస్పీ), బహుజన్ సమాజ్‌వాదీ పార్టీ (బీఎస్పీ)లు ప్రత్యర్థులుగా ఉన్నారు. ఈ రెండు పార్టీల నేతలకు ఒకరంటే ఒకరికి ఏమాత్రం పడదు. అలాంటి ఎస్పీకి చెందిన ఎమ్మెల్యే కుమార్తెను బీఎస్పీ నేత తన కుమారుడు ఇచ్చిన వివాహం చేశారు. ఈ విషయం ఆ పార్టీ అధినేతి, మాజీ ముఖ్యమంత్రి మాయావతి దృష్టికి వెళ్లింది. అంతే.. ఆమె ఒక్కసారిగా తీవ్ర ఆగ్రహోద్రుక్తులయ్యారు. సమాజ్‌వాదీ పార్టీ ఎస్సీ వర్గానికి చెందిన ఎమ్మెల్యే కుమార్తెను ఇంటి కోడలిని చేసుకున్న బీఎస్పీ నేతను పార్టీ నుంచి ఆమె బహిష్కరించారు. ఈ అంశం ఇటు పార్టీలోనే కాకుండా అటు రాష్ట్ రాజకీయాల్లోనూ సంచలనంగా మారింది. 

మాయవతి సారథ్యంలోని బీఎస్పీలో ఒకప్పుడు ఎంపీ, ఎమ్మెల్యేగా పనిచేసిన త్రిభువన్ దత్తా కుమార్తెతో బీఎస్పీ సీనియర్ నేత అయిన సురేంద్రసాగర్ తన కుమారుడు అంకుర్ వివాహం జరిపించారు. యూపీ మాజీ ముఖ్యమంత్రి అయిన మాయవతికి ఇది కోపం తెప్పించింది. తన వ్యతిరేక వర్గానికి చెందిన పార్టీ నేతతో వియ్యం అందుకోవడాన్ని ఆమె జీర్ణించుకోలేకపోయారు. సాగర్‌ను రాంపూర్ జిల్లా అధ్యక్ష పదవి నుంచి తొలగించడంతో పాటు, పార్టీ వ్యతిరేక కార్యకలాపాలకు పాల్పడుతున్నారంటూ పార్టీ నుంచి బహిష్కరిస్తూ ఆదేశాలు జారీ చేశారు.

బరేలీ డివిజన్కు చెందిన సురేంద్రసాగర్ గతంలో కేబినెట్ మంత్రిగానూ పనిచేశారు. పార్టీలో కీలక పదవులు నిర్వర్తించారు. రాంపూర్ జిల్లా అధ్యక్షుడిగా ఐదుసార్లు పనిచేశారు. అయితే, ఇప్పుడు సమాజ్ వాదీ పార్టీ నేతతో సంబంధం కలుపుకోవడం, వివాహానికి ఎస్పీ చీఫ్ అఖిలేశ్ యాదవ్ హాజరు కావడంతో ఆగ్రహించిన మాయావతి పార్టీ నుంచి సురేంద్ర సాగర్‌ను బహిష్కరించారు. అయితే, తానేమీ పార్టీ వ్యతిరేక విధానాలకు పాల్పడలేదని, తన కుమారుడికి పెళ్లి మాత్రమే జరిపించానని సాగర్ వివరణ ఇచ్చారు.