వివాహేతర సంబంధం మంచిది కాదు అని చెప్పినందుకు ఓ వ్యక్తి పై అతని స్నేహితుడు కత్తితో దాడి చేశాడు. ఈ ఘటన సంతోష్‌నగర్‌ పోలీస్‌స్టేషన్‌ పరిధిలో మంగళవారం రాత్రి చోటు చేసుకుంది.
వివరాల్లోకి వెళితే.. రియాసత్‌నగర్‌ ప్రాంతానికి చెందిన ఆటో డ్రైవర్‌ మహ్మద్‌ ఇసా, షాహీనగర్‌ ప్రాంతానికి చెందిన అక్బర్‌ ఖాన్‌ లిద్దరూ స్నేహితులు. అయితే అక్బర్‌ ఓ మహిళతో వివాహేతర సంబంధం కొనసాగిస్తున్నాడు.
ఇదిలా ఉండగా ఈ నెల 24న రాత్రి రియాసత్‌నగర్‌లోని డికాషన్‌ హోటల్‌ వద్ద ఇసాను స్నేహితుడు అక్బర్‌ ఖాన్‌ కలిశాడు. వివాహేతరం సంబంధం మంచిది కాదని మహ్మద్‌ ఇసా తన స్నేహితుడికి సూచించాడు.
దాంతో కోపోద్రిక్తుడైన అక్బర్‌ ఖాన్‌ కత్తితో ఇసా ముఖంపై దాడి చేశాడు. ఇది గమనించిన స్థానికులు వెంటనే పోలీసులకు ఫిర్యాదు చేశారు. దాంతో పోలీసులు ఘటన స్థలానికి చేరుకున్న ఇసాను చికిత్స నిమిత్తం ఆస్పత్రికి తరలించారు.
ఇసా ముఖంపై ఎనిమిది కుట్లు పడ్డాయి. పోలీసులు కేసు నమదు చేసుకుని అక్బర్‌ ఖాన్‌ను బుధవారం అరెస్ట్‌ చేసి రిమాండ్‌కు తరలించారు.