మహారాష్ట్రలో వైద్యుల నిర్లక్ష్యం కారణంగా.. ముక్కుపచ్చలారని 8 నెలల పసికందుకు హెచ్ఐవీ సోకింది. వివరాల్లోకి వెళ్తే.. మహారాష్ట్ర, అకోలా జిల్లా ముర్తిజాపుర్ మండలంలోని హిర్పుర్కు చెందిన దంపతులకు 8 నెలల క్రితం పాప జన్మించింది.
చిన్నారి జన్మించిన మూడు రోజుల తర్వాత చిన్న, చిన్న అనారోగ్య సమస్యలు తలెత్తడంతో.. ముర్తిజాపుర్లోని చిల్డ్రన్ హాస్పిటల్‌కి తీసుకొచ్చారు. పలు రకాల మెడికల్ టెస్టులు చేసిన డాక్టర్లు.. చిన్నారికి రక్తకణాలు తక్కువగా ఉన్నాయని.. వెంటనే రక్తం ఎక్కించాలన్నారు. దీంతో ఆ తల్లిదండ్రులు అకోలాలోని బీపీ ఠాక్రే బ్లడ్బ్యాంకు నుంచి రక్తాన్ని తీసుకొచ్చారు.
డాక్టర్లు ఆ రక్తాన్ని చిన్నారికి ఎక్కించారు. అయితే.. ఇటీవల చిన్నారికి తీవ్రమైన అనారోగ్య సమస్యలు తలెత్తాయి. దీంతో ఆస్పత్రికి తీసుకెళ్లగా వైద్యపరీక్షలు నిర్వహించారు డాక్టర్లు. చిన్నారికి హెచ్ఐవీ పాజిటివ్ ఉన్నట్లు పరీక్షల్లో నిర్ధారణ అయ్యింది.
వెంటనే బాలిక తల్లిదండ్రులకూ పరీక్షలు నిర్వహించారు. అయితే వారిద్దరికీ నెగెటివ్ వచ్చింది. దీంతో చిన్నారికి హెచ్ఐవీ సోకిన వ్యక్తి రక్తం ఎక్కించారని నిర్ధారణ అయ్యింది. ఈ ఘటనపై కేంద్ర ఆరోగ్యశాఖ మంత్రికి ఫిర్యాదు చేశారు.