డేరా సచ్చా సౌధా అధినేత గుర్మీత్ రామ్ రహీమ్ సింగ్ దత్త పుత్రిక హనీప్రీత్‌కు పోలీసులు లుక్‌అవుట్‌ నోటీసులు జారీ చేశారు. రేప్‌ కేసులో పంచకుల కోర్టులో దోషిగా తేలిన తర్వాత గుర్మీత్ తప్పించుకునే ప్రయత్నం చేసినట్లు...ఇందుకు హనీప్రీత్ ప్లాన్ వేసినట్లు పోలీసులు తెలిపారు. ఫలితంగా హనీప్రీత్‌పై దేశద్రోహం కేసు నమోదైంది. ఇద్దరు సాధ్వీలపై అత్యాచారం చేసిన కేసులో గుర్మీత్ రామ్ రహీమ్‌కు 20 ఏళ్ల జైలు శిక్ష పడిన విషయం తెలిసిందే.
అప్పటి నుంచి గుర్మీత్‌కు ఎప్పుడూ నీడలా ఉండే హనీప్రీత్ అలియాస్ ప్రియాంకాతనేజా అజ్ఞాతంలోకి వెళ్ళిపోయారు. ఆమె నేపాల్‌లో వున్నట్లు పోలీసులు చెపుతున్నారు. గుర్మీత్ రామ్ రహీమ్ సింగ్ తరువాత డేరా సచ్చా సౌధా బాధ్యతలు చేపడుతుందని అందరూ భావిస్తూ వచ్చిన హనీప్రీత్ సింగ్ నేపాల్‌కు పారిపోయింది. ఈమె కోసం పోలీసులు తీవ్ర గాలింపు చర్యలు చేపట్టారు.
ఈ నేపథ్యంలో హనీప్రీత్ సింగ్‌కు సంబంధించిన ఆసక్తికరమైన విషయాలు వెలుగులోకి వస్తున్నాయి. తన అభిమాన నటి అయిన కత్రినా కైఫ్‌లా కనిపించాలన్న ఉద్దేశంతో హనీప్రీత్ సింగ్ ఎంతో కష్టపడినట్టు తెలుస్తోంది. ప్రస్తుతం నేపాల్‌కు పారిపోయినట్టు తేల్చిన పోలీసులు, ఆమె కోసం వేట ముమ్మరం చేసిన సంగతి తెలిసిందే.
వయసు పెరుగుతున్న కొద్దీ, ఆమెకు తన అందంపై దిగులు ఎక్కువగా ఉండేదని, కత్రినాలా చాలా కాలం అందంగా ఉండాలని కోరుకునే ఆమె, ఎంతో శ్రమించి రోజుకు మూడు గంటల పాటు ఎక్సర్ సైజులు చేసేదని ఆమె పర్సనల్ జిమ్ ట్రైనర్ మీడియాకు తెలిపాడు.
ఎక్సర్ సైజ్‌లు చేస్తూ అలసిపోయినట్టు అనిపిస్తే, వెంటనే ''ధూమ్-3''లోని కత్రినా పాట పెట్టుకుని డ్యాన్స్ చేస్తూ, అలసటను మరచిపోయేదని, గుర్మీత్ కూడా అక్కడే వర్కవుట్లు చేసేవాడని తెలిపాడు. ఇక గుర్మీత్, హనీప్రీత్ అనుక్షణం ఏకాంతంగా గడుపుతూ ఉండేవారని..ఎప్పుడన్నా బయటకు వెళ్తే.. ఒకే గదిలో బసచేసేవారని ఓ సాధ్వి వ్యాఖ్యానించింది. కాగా, ప్రస్తుతం పోలీసులు హనీప్రీత్‌తో పాటు డేరా ప్రతినిధిగా ఉండి, ప్రస్తుతం తప్పించుకు తిరుగుతున్న ఆదిత్య ఇన్సాన్ కోసం కూడా గాలిస్తున్నారు.