హెలికాఫ్టర్‌ ద్వారా నిండు గర్భిణీని కాపాడారు.. పండంటి మగబిడ్డకు..?

తమిళనాడు తూత్తుకుడి వరదల నుండి వైమానిక దళం ద్వారా రక్షించబడిన పి. అనూష్య అనే గర్భిణి పండంటి మగబిడ్డకు జన్మనిచ్చింది. మంగళవారం శ్రీవైకుంఠంలోని భవనంపై నుంచి అనూష్యతోపాటు ఆమె భర్త పెరుమాళ్, పెద్ద బిడ్డ, తల్లిని రక్షించారు. 

సూలూరు ఎయిర్‌ఫోర్స్‌ బేస్‌కు చెందిన బృందం సహాయక చర్యలు చేపట్టింది. నిండు గర్భిణి అయిన అనూష్యను ఎయిర్ ఫోర్స్ టుటికోరిన్‌లోని హెలికాప్టర్‌కు తీసుకువెళుతున్న ఫోటోలు సోషల్ మీడియాలో వైరల్ అయ్యాయి.

భారీ వర్షాలు ఆగిపోవడంతో తిరునల్వేలి, తూత్తుకుడి, తెన్కాశి, కన్యాకుమారి జిల్లాలు వరదల నుంచి మెల్లగా కోలుకుంటున్నాయి. తామరభరణి నదిలో నీటిమట్టం తగ్గుముఖం పట్టడంతో నగరంలో వరదనీరు పోటెత్తింది. అదే సమయంలో, రోడ్లు భారీగా దెబ్బతినడంతో ట్రాఫిక్ పూర్తిగా పునరుద్ధరించబడలేదు. 

ఇంతలో, తిరునల్వేలి రైల్వే స్టేషన్, టుటికోరిన్ విమానాశ్రయం పూర్తిగా కార్యకలాపాలు పునరుద్ధరించబడ్డాయి. రైల్వే ట్రాక్, సిగ్నల్ వ్యవస్థలు దెబ్బతిన్న తిరునెల్వేలి - తిరుచెందూర్ సెక్షన్ల మధ్య రైలు సేవల పునరుద్ధరణ ఆలస్యం అవుతుంది. ఈ మార్గంలో నడిచే ప్యాసింజర్ రైళ్లను కూడా రద్దు చేశారు. 

తిరునల్వేలి కోక్రాకుళం మహిళా జైలులో నీరు చేరడంతో 33 మంది మహిళా ఖైదీలను పాలయంకోట సెంట్రల్ జైలుకు తరలించారు. వరద ప్రభావిత ప్రాంతాల్లో విద్యుత్‌ను పునరుద్ధరించేందుకు కూడా ప్రయత్నాలు జరుగుతున్నాయి. 

కాగా, ఢిల్లీ చేరుకుని ప్రధానితో భేటీ అయిన ముఖ్యమంత్రి ఎం.కె. స్టాలిన్ రూ.12,659 కోట్లు పరిహారంగా ఇవ్వాలని డిమాండ్ చేశారు. రూ.7300 కోట్లు తక్షణ సాయంగా ఇవ్వాలని, వరదను జాతీయ విపత్తుగా ప్రకటించాలని స్టాలిన్‌ కోరారు. నష్టం అంచనాకు వచ్చిన కేంద్ర బృందం పలుచోట్ల తనిఖీలు చేపట్టింది.