తండ్రి వజ్రాల వ్యాపారి.. జీవితంపై విరక్తి చెంది. 9 యేళ్లకే సన్యాసం ... ఎక్కడ?

ఆమె తండ్రి ఓ వజ్రాల వ్యాపారి. కోటీశ్వరుడు. సుసంపన్నమైన కుటుంబం. కానీ, ఆ చిన్నారికి మాత్రం ఆ సిరిసంపదలంటే ఏమాత్రం ఇష్టం లేదు. లగ్జరీ జీవితంపై అస్సలే మోజు లేదు. అందుకే తొమ్మిదేళ్ల ప్రాయంలోనే సన్యాసం స్వీకరించి, ప్రతి ఒక్కరినీ ఆశ్చర్యపరిచింది. ఇది గుజరాత్ రాష్ట్రంలోని సూరత్ నగరంలో వెలుగు చూసింది. తాజాగా వెలుగులోకి వచ్చిన ఈ వివరాలను పరిశీలిస్తే,

సూరత్‌కు చెందిన ధనేష్ అనే వజ్రాల వ్యాపారి ఉన్నారు. ఈయన భార్య అమీ సంఘ్వీ. మూడు దశాబ్దాలుగా వజ్రాల వ్యాపారం చేస్తున్నారు. వజ్రాలను పాలిష్ చేయడం, వాటిని ఎగుమతి చేసే వ్యాపారం. ఈ దంపతులకు దేవాన్షి అనే తొమ్మిదేళ్ల బాలిక ఉంది. చిన్నవయస్సు నుంచే ఆధ్యాత్మిక చింతన మెండుగా ఉండేవి. అందుకే ఆ బాలిక ఆధ్యాత్మిక జీవితంపై ఆసక్తి పెంచుకుంది. చివరకు సన్యాసం స్వీకరించాలని భావించింది. తన మనస్సులోని మాటను తల్లిదండ్రులకు చెప్పింది. వారు తొలుత ససేమిరా అనప్పటికీ ఆ తర్వాత కుమార్తె పట్టుదలకు తలొగ్గారు. 

ఆ తర్వాత జైన సన్యాసి ఆచార్య విజయ కార్తియాశ్సూరి సమక్షంలో ఆ చిన్నారి బుధవారం సన్యాసి దీక్షను స్వీకరించింది. ఈ దీక్ష తీసుకోవడానికి ముందు ఇతర సన్యాసులతో కలిసి ఏకంగా 700 కిలోమీటర్ల మేరకు పాదయాత్ర చేసింది. ఈ తొమ్మిదేళ్ళ బాలిక ఐదు భాషల్లో సరళంగా మాట్లాడగలదు. ఈ బాలిక సన్యాసి స్వీకరణ కార్యక్రమానికి చుట్టు పక్కల ప్రాంతాలకు చెందిన వందలాది మంది తరలిరావడం గమనార్హం.