భార్యపై అనుమానం పెంచుకున్న వృద్ధుడు.. ఆమెతో రోజూ గొడవకు దిగేవాడు. అయితే ఆ వృద్ధుడు అనుమానిస్తున్న వ్యక్తికి ఆమె కొడుకు వయస్సు ఉంటుంది. అయినా ఆరు పదుల వయస్సు దాటిన భార్య చెయ్యిని విరగొట్టాడు. ఈ ఘటన బెంగళూరులో చోటుచేసుకుంది. పూర్తి వివరాల్లోకి వెళితే.. బెంగళూరు పట్టణానికి చెందిన ఓ వ్యక్తి (78) సెక్రటేరియట్లో మాజీ ఉద్యోగి. తన భార్య (68)తో కలిసి నివసిస్తున్నాడు.
ఇంటిలో ఇద్దరు మాత్రమే ఉండడం.. పెద్ద ఇల్లు కావడంతో మరో వ్యక్తి (44)కి అద్దెకు ఇచ్చారు. ఆ వ్యక్తి తన భార్య(34)తో కలిసి ఆ ఇంటిలోనే అద్దెకు ఉంటున్నారు. అయితే ఆ వ్యక్తి భార్య గర్భిణీ కావడంతో డెలివరీ కోసం జనవరిలో పుట్టింటికి వెళ్లింది. దీంతో ఆమె భర్త ఒంటరిగా ఉంటూ వండుకుని తింటున్నాడు. కానీ అతడికి వంటలు సరిగా చేయరాకపోవడాన్ని గమనించిన వృద్ధ మహిళ అతడికి వంట, ఇంటి పనిలో సాయపడేది.
ఈ క్రమంలో 78 ఏళ్ల వ్యక్తి వృద్ధ మహిళ అయిన భార్య ఆ వ్యక్తితో వివాహేతర సంబంధం పెట్టుకుందని అనుమానించాడు. ఆ అనుమానంతో భార్యతో గొడవపడేవాడు. అయినా ఆ యువకుడికి వృద్ధ మహిళ సాయపడటం ఆపలేదు. దీంతో ఆవేశానికి గురైన వృద్ధుడు ఒక రోజు భార్యతో గొడవపడి వృద్ధురాలు అని చూడకుండా ఆమె చెయ్యి విరగొట్టడంతో పాటు తీవ్రంగా గాయపరిచాడు. ఇక ఆ వృద్ధ మహిళ పరిహార్ హెల్ప్ డెస్క్కు ఫోన్ చేసి ఫిర్యాదు చేసింది.