అంధేరి హోటల్ గదిలో 30 యేళ్ల ముంబై మోడల్ ఆత్మహత్య

ముంబైలోని అంధేరిలో ఉన్న ఓ హోటల్‌లో 30 యేళ్ల మోడల్ ఒకరు ఆత్మహత్య చేసుకున్నారు. ఫ్యానుకు ఉరి వేసుకుని ఈ దారుణానికి పాల్పడ్డారు. హోటల్ గదిలోని ఫ్యానుకు మోడల్ మృతదేహాన్ని పోలీసులు స్వాధీనం చేసుకున్నారు. ఆమె మృతదేహాన్ని పోస్టుమార్టం నిమిత్తం ఆస్పత్రికి తరలించారు. 

పోలీసులు కథనం మేరకు.. బుధవారం రాత్రి 8 గంటల ప్రాంతంలో మృతురాలు హోటల్‌ గదిలో ఓ గదిని అద్దెకు తీసుకుంది. రాత్రి భోజనానికి కూడా ఆర్డరిచ్చింది. అయితే, గురువారం ఉదయం నుంచి ఆమె తలుపు తెరవలేదు. దీంతో హౌస్ కీపింగ్ సిబ్బంది పలుమార్లు తలుపు తట్టినట్టినప్పటికీ ఆమె వైపు నుంచి స్పందన రాలేదు. దీంతో హోటల్ మేనేజరు పోలీసులకు సమాచారం అందించారు. 

దీంతో పోలీసులు హోటల్‌కు వచ్చి గది తలుపులు పగులగొట్టి లోనికి వెళ్లి చూడగా మోడల్ ఫ్యానుకు వేలాడుతూ కనిపించింది. ఈ గదిలోనే ఆమె రాసిపెట్టిన ఓ సూసైడ్ లేఖను కూడా స్వాధీనం చేసుకున్నారు. "నన్ను క్షమించండి. నా మరణానికి ఏ ఒక్కరూ కారణం కాదు. నేను సంతోషంగా లేను. నాకు శాంతి కావాలి. అందుకే వెళ్లిపోతున్నా" అంటూ అందులో పేర్కొన్నారు. అయితే, ఆత్మహత్య చేసుకున్న మోడల్ పేరు, ఇతర వివరాలు తెలియాల్సివుంది.