పిల్లల్లో ఆత్మవిశ్వాసం పెరగాలంటే.. వారికి అదేపనిగా పాఠాలు నేర్పించడం కాదు. తల్లిదండ్రులు వారిపట్ల చూపే ప్రేమతోనే ఆత్మవిశ్వాసం పెరుగుతుంది. మరి ఆ విశ్వాసాన్ని వారిలో ఎలా పెంచాలో తెలుసుకుందాం..
మీరు ఉద్యోగం చేస్తున్నా లేదా ఇంటి పనులతో తీరికలేకపోయినా.. పిల్లలతో వీలైనంత ఎక్కువగా సమయం కేటాయించేలా చూసుకోవాలి. కనీసం రోజులో ఓ గంటపాటైనా పిల్లలతో గడిపేలా ఉంటే.. వారికి ఎంతో సంతోషంగా ఉంటుంది. అది మీ మధ్య బంధాన్ని కూడా రెట్టింపు చేస్తుంది. దాంతోపాటు వారిలో ధైర్యాన్ని కూడా పెంచుతుంది.
పిల్లలకు ఏదైనా చెప్పించేటప్పుడు.. మనం అన్నివేళలా వారికి తోడుగా ఉంటామని వారికి ధైర్యాన్ని పెంచాలి. వాళ్లు ఏ మాత్రం నిరుత్సాహంగా ఉన్నా దగ్గరకు తీసుకుని కబుర్లు చెప్పాలి. ఒక్క మాటలో చెప్పాలంటే మీ ప్రేమను స్పర్శద్వారా చిన్నారులకు తెలియజేయాలి. ఇది వారిలో ఆత్మవిశ్వాసాన్ని పెంచుతుంది.
ఒక్కోసారి పిల్లలు తల్లిదండ్రులను విసిగిస్తుంటారు. వెంటనే తల్లిదండ్రులు చేసే పని.. నాలుగు దెబ్బలు వేయడం లేదా గట్టిగా కోప్పడడం. అలా చేయడం వలన వారు మరింత మొండిగా మారుతారు తప్ప మీ మాట వినరు. అందుకే ఆ సమయంలో కాసేపు మౌనంగా ఉండండి.. తర్వాత నిదానంగా చెప్పండి.. వాళ్ల గురించి వాళ్లకే తెలుస్తుంది.