గూగుల్ ప్లే స్టోర్ నుంచి పేటీఎంను తొలగించినట్లు సోషల్ మీడియాలో విపరీతంగా వైరల్ అయిన సంగతి తెలిసిందే. అలా తీసి వేసిన కొన్ని గంటలకే పేటీఎం తిరిగి గూగుల్ ప్లే స్టోర్‌లో కనిపించింది. ఈ విషయాన్ని పేటీఎం కంపెనీ ట్వీట్ చేసింది.
కానీ పేటీఎం గేమ్స్ యాప్ మాత్రం ఇంకా ప్లే స్టోర్ లోకి రాలేదు. గూగుల్ ప్లే స్టోర్ శుక్రవారం నాడు పేటీఎంకు షాక్ ఇచ్చింది. పేటీఎంను గూగుల్ ప్లేస్టోర్‌ నుంచి తొలగించింది. పేటీఎంలో జూదాన్ని ప్రోత్సహించే ఫీచర్లు ఉండటంతో గూగుల్ పేటీఎంను ప్లేస్టోర్‌ నుంచి తొలగించింది. కానీ కొన్ని గంటల తర్వాత పేటీఎం తిరిగి గూగుల్ ప్లే స్టోర్ లో కనిపించింది.
కానీ అంతకుముందు పేటీఎంతోపాటు పేటీఎం ఫస్ట్ గేమ్స్‌ను సైతం మొదట తొలగించింది. పేటీఎం బిజినెస్‌, పేటీఎం మాల్‌, పేటీఎం మనీ యాప్స్ మాత్రం యథావిధిగా అందుబాటులో ఉండగా పేటీఎం, పేటీఎం గేమ్స్ యాప్‌లను మొదట తీసివేసింది. గ్యాంబ్లింగ్‌ నిబంధనలు ఉల్లంఘించిన నేపథ్యంలో గూగుల్ ఈ చర్యలు తీసుకున్నట్లు తెలుస్తోంది.
గతంలో పేటీఎంకు గూగుల్ నోటీసులు జారీ చేసింది. తరచూ నిబంధనలు ఉల్లంఘించడంతో తాజాగా ఈ చర్యలు తీసుకున్నట్లు సమాచారం. గూగుల్ నిబంధనల ప్రకారం యాప్స్ ఎలాంటి జూదాలు, ఆన్‌లైన్‌ బెట్టింగులు నిర్వహించకూడదు. కానీ పేటీఎం, పేటీఎం ఫస్ట్ గేమ్‌ యాప్స్ ద్వారా ఫాంటసీ క్రికెట్‌ సేవలను ప్రారంభించడం గూగుల్‌కు నచ్చలేదు.