జియో మరో సంచలనానికి రెడీ... ఏడాది పాటు ఉచిత డేటా... ఆ సేవలు కూడా...

రిలయన్స్ జియో ఏడాది తిరిగితే కొత్త ఆఫర్‌తో ప్రత్యర్థి నెట్వర్కులకు షాకులు ఇస్తోంది. ఇపుడు జియోకి సంబంధించి మరో వార్త బయటకు వచ్చింది. అదేమిటంటే... కేవలం రూ.600తో టెలీఫోన్(ల్యాండ్ లైన్), టీవీ, డేటా సౌకర్యాలను అందించేందుకు సన్నాహాలు చేస్తోంది.

గిగాఫైబర్ కింద బ్రాండ్‌బ్యాండ్, టెలివిజన్, ల్యాండ్‌లైన్ సేవలు అందించే అవకాశాలున్నట్లు కంపెనీ అధికారులే చెపుతుండటంతో ఇక జియో గిగా ఫైబర్ వస్తే ప్రత్యర్థి నెట్వర్కులు మరోసారి తీవ్రమైన పోటీని ఎదుర్కోక తప్పని పరిస్థితికి చేరిపోనున్నాయి.

కాగా ఇప్పటికే గిగాఫైబర్ సేవలను న్యూఢిల్లీ, ముంబైల్లో పైలెట్ ప్రాజెక్టు కింద అందిస్తోంది జియో. ఇందులో ఉచితంగానే నెలకు 100 జీబీ డేటాను 100 ఎంబీపీఎస్ స్పీడ్‌తో ఇస్తోంది. కాగా ఈ సేవలను రూ. 4,500 వన్ టైమ్ డిపాజిట్ చేసి పొందవచ్చు. ఇలా డిపాజిట్ చేసినవారు పైన పేర్కొన్న మూడు సర్వీసులు ఏడాది పాటు ఉచితంగా పొందో అవకాశం వుంటుంది. ఇంకా దీనికి సంబంధించి త్వరలో మరిన్ని వివరాలు తెలియజేయనుంది జియో. జియో గిగాఫైబర్ కావాలనుకునేవారు gigafiber.jio.com/registration లింక్ ద్వారా రిజిస్ట్రర్ కావాల్సి వుంటుంది.